iklan

POLÍTIKA

Opozisaun krítika PR Horta nia diskursu la refleta situasaun atuál

Opozisaun krítika PR Horta nia diskursu la refleta situasaun atuál

Prezidente Repúblika, José Ramos Horta. Imajen Tatoli/Egas Cristóvão.

DILI, 22 maiu 2024 (TATOLI)—Deputadu husi bankada opozisaun PLP, Maria Angelica Sarmento, krítika diskursu Prezidente Repúblika (PR), José Ramos Horta nian ne’ebé hato’o iha komemorasaun loron restaurasaun independénsia ba da-22 (20 maiu 2002 no 20 maiu 2024) la refleta situasaun atuál.

Notísia Relevante: Liurai Hassanal Bolkiah agradese no promete hametin relasaun ho Estadu TL

“Triste tebes órgaun Prezidente Repúblika hanesan ema númeru um (1) iha rai ida-ne’e, hatene di’ak tebes povu ida-ne’e nia halerik ba situasaun reál ne’ebé agora akontese, hanesan problema sosiál iha edukasaun, problema saúde kona-ba ai-moruk stock out, sasán hanesan foos folin sa’e, problema despeju administrativu muda ema laiha kondisaun. Problema sosiál ne’ebé ita hasoru iha ita-nia rai ne’ebé tuir loloos sai atensaun atu Xefe Estadu ko’alia hodi reprezenta povu ne’ebé mak hili direitamente, maibé PR ninia mensajen sira la hato’o,” nia hateten iha resintu Parlamentu Nasionál, kuarta ne’e.

Nu’udar opozisaun iha dever atu ko’alia, haree ba mensajen ida-ne’e la reflete nu’udar ema númeru um (1) iha nasaun ne’e ne’ebé mak hamriik hodi defende povu ne’e ninia direitu.

Deputadu FRETILIN, Aniceto Longuinhos Guterres Lopes, hanesan PR laiha mensajen espesífiku iha loron restaurasaun independénsia 20 maiu ba da-22 kona-ba situasaun ne’ebé daudaun ne’e povu no nasaun hasoru.

“Loron 20 maiu, ha’u la rona husi Xefe Estadu, laiha mensajen husi Xefe Estadu kona-ba 20 maiu. Diskursu iha komemorasaun 20 maiu mamuk loos, hanesan diskursu atu simu de’it bainaka de’it maibé laiha mensajen ne’ebé ita hanoin katak buat hotu la’o di’ak hela. Estadu  ne’e  buat hotu di’ak no ita la preokupa ho buat ida restaurasaun ba da-22, ita-nia situasaun hanesan igreja Katólika ko’alia  fanu ita, maibé ita la halo kazu,” nia hateten

Tuir loloos, nia dehan, PR nia diskursu iha komemorasaun loron restaurasaun independénsia ne’e tenke ho mensajen ne’ebé refleta duni ba progresu dezenvolvimentu ne’ebé daudaun ne’e la’o hela iha rai-laran.

Deputadu CNRT, Gabriel Soares, hanoin ida-ne’e interpretasaun ema ida-idak ninian maibé Prezidente Repúblika nu’udar simbolu Estadu RDTL ema númeru um (1) iha nasaun ne’e nia diskursu ne’e akumula buat hotu-hotu.

“Atu hateten de’it hanesan ne’e, Prezidente Repúblika primeiru homem da nação nia diskursu ne’e tantu liuhusi eskrita no verbalmente nia fó sai liafuan ida mak Prezidente dehan katak, parabéns ba povu Timor-Leste iha territóriu nasionál ne’ebé ohin komemora loron restaurasaun independénsia 20 maiu 2024 ba da-22. Ho orgullu signifika katak, mensajen PR nian hanesan aman ba nasaun nian akumula buat hotu-hotu, tanba povu iha loron ida-ne’e selebra loron restaurasaun independénsia, katak hahú kedas husi PR to’o ba iha povu tomak sente orgullu atu komemora loron restaurasaun independénsia,” nia hateten.

Ne’ebé, nia dehan, mensajen Prezidente Repúblika (PR) nian nu’udar aman ba nasaun nia akumula situasaun hotu-hotu.

“Ne’e interpretasaun ema ida-idak ninian maibé Prezidente Repúblika nu’udar simbolu Estadu RDTL, ema númeru um (1) iha nasaun ne’e nia diskursu ne’e akumula. Tanba ko’alia kona-ba kestaun ai-moruk ne’e Governu ba iha Ministériu Saúde no ko’alia foos folin sa’e ne’e iha ministériu ida seluk. PR hanesan aman, nia ko’alia buat hotu-hotu la refere liu ba ida-ne’e, tanba nia hatene katak kna’ar Governu nian no Governu sei haree kona-ba ai-moruk stock out, folin foos sa’e, tan ida-ne’e iha tiha ona Governu nia serbisu,’’ nia dehan.

PR ko’alia iha loron komemorasaun foku ba Timor-Leste nia restaurasaun ba independénsia ne’ebé povu TL orgullu iha loron ida-ne’e atu festeza hodi komemora.

Tan ne’e, nia dehan, kona-ba asuntu ai-moruk laiha, foos folin sa’e ida ne’e PR hanoin tiha ona no ko’alia beibeik ona, entaun la presiza tan PR atu relata fila-fali tan tanba Governu iha.

“Ne’ebé, ko’alia kona-ba difikuldade povu nian, PR ko’alia baibain ona iha nia entrevista sira no ita hotu akompaña beibeik,” nia hateten.

Entretantu, jornalista sira konfirma asuntu ne’e ba Xefe Estadu iha Palásiu Prezidensiál Nicolau Laobato, Bairru Pité, Dili, Prezidente Repúblika, José Ramos Horta, hatán ho hamnasa de’it.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!