DILI, 23 maiu 2024 (TATOLI)–Diretór Servisu Apoiu Diagnóstiku no Terapeutiku iha Hospital Nasionál Guido Valadares (HNGV), Vidal de Jesus, hateten iha trimester dahuluk (janeiru-marsu 2024) ne’e HNGV rejista ema-ne’ebé mate hamutuk 456.
“Husi totál ne’e, ema-ne’ebé iha Hospitál Nasionál Guido Valadares (HNGV) ne’e kompostu husi asidente hamutuk 41, bebé mate hamutuk 76 no restante ne’e ema-ne’ebé mate ho moras seluk ne’ebé internadu iha HNGV,” Diretór Servisu Apoiu Diagnóstiku no Terapeutiku iha Hospitál Nasionál Guido Valadares (HNGV), Vidal de Jesus, hateten ba jornalista sira iha HNGV.
Nia esplika, númeru moratalidade iha HNGV sei tuir iha padraun global tuir sasukat barak hanesan rekursu material no umanu.
Aleinde ne’e, nia relata husi fulan-jullu tinan 2023 to’o fulan-marsu tinan 2024 ne’e, HNGV rejista kazu mortalidade hamutuk 1.348.
“Kazu mortalidade ne’e loos. Kada fulan ema mate iha HNGV entre 110 130 depende ba moras. Fulan-fulan no loro-loron mós mate iha hela de’it,” nia dehan.
Nia esplika, kazu mortalidade ne’e la’ós kauza tanba ai-moruk iha HNGV laiha maibé ne’e kazu moras gravidade pasiente sira-nian no iha apsiente balun ne’ebé familia sira lori mai HNGV ne’e mate tiha ona.
“Atu define ema mate ne’e tuir investigasaun. Sistema ne’ebé mak la’o hela mak iha auditoria nível departamentu hanesan medisina interna, pediatria no seluk tan ne’ebé halo audit kona-ba mortalidade audit hodi hatene kauza mate tanba moras grave, ai-moruk laiha ka atendimentu tarde mak mate ka buat seluk. Ida-ne’e mak foin hatene kauza husi mate mak ida-ne’ebé,” nia esplika.
Husu kona-ba idade prevalénsia ba iha kazu mortalidade iha HNGV, diretór ne’e hatán, laiha dadus konkretu maibé iha bebé mate iha inan nia knotak (kabun laran) mós barak no estimativa ema mate ho idade entre 40 to’o 70 mós barak.
Jornalista : Jesuína Xavier
Editór : Cancio Ximenes
