DILI, 23 maiu 2024 (TATOLI) – Programa BRUCE-TL-Brucellosis Reduction Using Codesign Elements in Timor-Leste hamutuk ho Ministériu Agrikultura, Pekuária, Peska no Floresta (MAPPF) inklui Ministériu Saude (MS) konsidera karau vaka kuaze 6% iha Munisípiu Bobonaro-Maliana afeta ona moras Brucellosis tanba ne’e parte tolu halo ona aproximasaun hodi interven ba virus ne’e atu labele hada’et liu tan karau sira.
Brucellosis katak baktéria ka moras ne’ebe bele hada’et husi animál ba ema.
Peskizadór seniór husi programa BRUCE-TL, Shawn Ting haktuir katak rezultadu husi estudu ne’ebé sira halo ne’e hatudu importánsia husi aprosimasaun saúde ida-ne’ebé responde ba brucellosis iha Timor-Leste, hosi mellora kompriensaun kona-ba oinsá moras ne’e tranzmite no afeta ba ema no karau vaka iha Timor-Leste, no sai baze ba intervensaun atu kombate moras ne’e iha futuru.
“Atividade ida-ne’e atu lori ema sira ne’ebé servisu iha área saúde animál ho ema sira iha nível nasionál to’o munisípiu, hamutuk ho BRUCE-TL no MAPPF ho MS hodi kombate moras brucellosis ba animál karau vaka no ema iha TL,” Shawn Ting dehan ba jornalista sira iha salaun JL vila Rua Ai-mutin, kinta (23/05)
Estudu ne’ebé programa BRUCE-TL realiza ne’e atu halo intervensaun direita ho apropriadu ba situasaun moras brucellosis iha Timor-Leste tanba moras Brucellosis ida-ne’e bele afeta ba karau vaka no ema liu-liu komunidade haki’ak na’in sira ho karau vaka iha área rurál mak sofre maka’as kona-ba moras ne’e.
Dalan di’ak liu tenke rezolve kona-ba problema ida-ne’e no ema hotu servisu liga ba idane’e mai hamutuk halo diskusaun oinsá bele problema moras brucellosis ne’e. Presiza tau iha konsiderasaun katak fatór risku ba moras brucellosis ne’e tenke iha duni atensaun, tanba ne’e governu tenke ajusta sira-nia polítika oinsá bele kontrola moras brucellosis ne’e ho efetivu liután.
Ne’e duni komunidade sira tenke hatene kona-ba moras brucellosis ne’e, saida mak sira atu halo ba risku ba moras brucellosis maka presiza servisu hamutuk ho sira oinsá bele halo mudansa risku ida-ne’e komunidade sira labele hetan moras. Portantu liuhusi programa BRUCE-TL ne’e rasik, governu Austrália apoiu orsamentu ho montante millaun $1 hodi utiliza atu kombate moras ne’e durante tinan-tolu hahú husi 2023-2026
Nune’e mós Diretora Diresaun Nasionál Veterinária (MAPPF), Joanita Bendita da Costa Jong hateten, brucellosis nu’udar moras ida-ne’ebé daudaun ne’e ameasa animál karau vaka no bele afeta mós ba ema nia vida. Ameasa ne’e konsidera signifikativu tebes ne’ebé bolu atensaun boot ba produtividade Pekuária no Saúde Públika nian.
“Ami rekoñese importánsia husi adaptasaun no aprosimasaun ba Saúde Ida hodi responde ba moras ida-ne’e atu bele redús risku hodi hasa’e produsaun animál iha rai-laran. Rezultadu husi estudu ida-ne’e fornese input importante ne’ebé sei uza ba esforsu atu kombate brucellosis iha Timor-Leste,” nia tenik.
Diretora ne’e dehan, servisu Diresaun Veterinária ninia iha tinan kotuk konsege hala’o ona peskiza ba moras brucellosis ho parseria sira hodi apoiu peskiza kona-ba moras brucellosis ba karau vaka sira iha área fronteira tolu mak hanesan iha Munisípiu Bobonaro, Covalima no inklui Rejiaun Administrativu Espesiál Oe-cusse Ambeno (RAEOA) ne’ebé halo ba suku 18 konsege identifika karau vaka hamutuk 48% maka afeta moras referidu.
Maibé, ohin, programa BRUCE-TL ne’e foku liu ba iha Maliana husi suku haat aprezenta katak númeru moras brucellosis kontinua aas kuaze 6% ne’e hatudu katak kada uma iha karau vaka tolu konserteza karau vaka ida otomatikamente afeta ona moras brucellosis ne’e, tanba ne’e Diresaun Nasionál Veterinária tenke halo sosializasaun, hakbesik aan ba komunidade sira hodi kontinua halo vasinasaun atu prevene moras ne’e labele hada’et ba fali karau sira seluk
Iha parte seluk, Prezidente Institutu Nasionál Saúde Públika Timor-Leste (INSP-TL), Merita Monteiro, hateten, proteje saúde públika ne’e importante tebes, liuhusi enkoraja perspetiva Saúde ida no servisu hamutuk ho parte interresada sira atu hamutuk hodi prevene moras brucellosis iha Timor-Leste.
Husi rezultadu estudu ne’ebé BRUCE-TL, aprezenta ne’e, sei orienta parte Saúde atu halo esforsu atu proteje mós komunidade sira tanba moras brucellosis ne’e la’ós afeta de’it ba animál sira maibé sei da’et ba ema nia saúde mós.
Nune’e mós Research Program Manager for Livestock system ACIAR, Anna Okello, esplika, kompriensaun ne’ebé di’ak liu kona-ba risku sira ne’ebé asosiadu ho tranzmisaun moras brucellosis husi karau vaka ba ema mak hanesan problema importante husi Saúde ida. ACIAR, iha parseria ho Canada’s International Development Research Centre (IDRC) kontente atu apoia Governu Timor-Leste hodi hetan benefísiu atu hadi’a saúde umana.
Iha komérsiu pekuária no seguransa ai-han liuhusi komponente importante ida-ne’ebé ACIAR-IDRC One Health Research Program (AIRPOH) iha Sudeste Aziátiku ne’e duni programa BRUCE-TL ne’ebé halo kolaborasaun serbisu hamutuk ho Ministériu Agrikultura, Pekuária, Peska no Floresta (MAPPF) inklui Institutu Nasionál Saúde Públika Timor-Leste (INSP-TL), Ministériu Saúde (MdS), Laboratóriu da Saúde (LdS INSP-TLS), no Laboratóriu Diagnóstiku Veterináriu (VDL). Ida-ne’e realiza tanba liuhusi apoiu finanseiru husi Australian Centre for International Agricultural Research (ACIAR) Canada no International Development Research Centre (IDRC).
Jornalista: Tomé Amado
Editór: Rafael Ximenes de A. Belo
