POLÍTIKA

Komisaun D kontinua rekomenda ba MAPPF hadi’a jestaun manutensaun tratór

Komisaun D kontinua rekomenda ba MAPPF hadi’a jestaun manutensaun tratór

Trator Agrikola Avaria/Imajen TATOLI

DILI, 23 maiu 2024 (TATOLI)—Komisaun D ne’ebé trata asuntu Ekonómia no Dezenvolvimentu iha Parlamentu Nasionál (PN), rekomenda ba Ministériu Agrikultura, Pekuária, Peska no Floresta (MAPPF) atu hadi’a jestaun manutensaun tratór.

Notísia Relevante: Komisaun D rekomenda MAP aumenta orsamentu manutensaun tratór iha Baucau

“Rekomenda ba MAPPF ba polítika manutensaun ba tratór labele atribui ba empreza, di’ak-liu mak parte ministériu estabelese armazén ba ekipamentu tratór no koloka ho pessoál mekániku balun hodi halo planu akizisaun ba ekipamentu tratór no tau iha ne’ebá. Bainhira pesa tratór ruma ne’ ebé aat, husi munisípiu bele asesu direta ba iha ne´eba. Ida ne’e prosesu fasil liu no lais liu, se liuhusi konkursu ba empreza prosesu aprovizionamentu demora. Realidade tratór kontinua aat ba beibeik,” haktuir relatóriu fiskalizasaun komisaun D ne’ebé Agência Tatoli asesu, kinta ne’e.

Rekomendasaun ne’e komisaun hato’o tanba  komisaun iha fulan-marsu tinan 2024 ne’e, lideradu husi Prezidente komisaun D, Ricardo Baptista akompañadu husi Deputadu membru komisaun hala’o fiskalizasaun ba munisípiu Covalima hodi identifika katak, presiza mellora jestaun ba manutensaun tratór.

Enkuantu, tuir dadus ne’ebé komisaun identifika durante iha fiskalizasaun ne’ebé hato’o husi  diresaun serbisu munisipál agrikultura munisípiu katak  daudaun ne’e ho totál forsa traballu iha funsionáriu 142, kompostu fhusi unsionáriu permanete iha 77 no funsionáriu kontratadu 43, no kazuál  22 mak nafatin serbisu maibé sira laiha kontratu.

Serbisu munisipál agrikultura iha departamentu rua hanesan departamentu agrikultura no ortikultura no departamentu pekuária, iha departamentu rua mak ho estatutu delegasaun territoriál hanesan departamentu floresta no departamentu peska.

Kona-ba área potensiál ba natar iha ektare 13,392 ho área produtivu ba natar iha ektare 2,126, no área potensial ba toos iha ektare 22,284 ho área produtivu ba batar iha ektare 8,672.

“Tratór boot iha unidade 30. Husi totál ne’e, iha tratór 17 mak sei di’ak hodi halo operasaun, ualu  (8) aat no lima (5) mak tama ona ba lelaun,” relatóriu komisaun D nian haktuir.

Atividade serbisu programa extensaun agrikola hanesan distribuisaun ai-oan ho totál 1000, hanesan has-oan 350, rambutan 300 no durian 350 ba iha postu administrativu Fatumea.

Distribuisaun fini batar tonelada 10 ba postu administrativu sira hotu iha Covalima, distribuisaun fini hare tonelada 20 ba postu adminitrativu Zumalai no postu administrativu Suai Vila no distribuisaun mákina dulas hare rua ba postu administrativu Zumalai, distribuisaun mákina rontok hare rua  ba postu adninistrativu Fatumea no Zumalai.

Distribuisaun mákina behu batar rua ba iha postu administrativu Fatululik no rua ba iha postu administrativu Suai Villa.

Enkuantu, atividade floresta iha tinan 2023, mak hala’o viveiru komunitária iha rua ho totál ai-oan 25.000 iha aldeia Santa Rosa-postu Suai Villa no iha suku Beiseuk-postu Tilomar, ba   programa floresta husi diresaun nasionál, kuda ai-kameli iha suku Zulo, postu Zumalai ba área ektare 50.

Ba atividade tinan 2024 nian mak halo vasinasaun ba manu 2200, vasina ba karau 626 no vasina asu 3,674.

Problema ne’ebé mak serbisu munisipál agrikultura hasoru mak hanesan funsionáriu ka ajente tratorista iha ema na’in-43 seidauk iha kontratu, tanba kontratu termina iha 31 dezembru 2023, maibé pesoál sira ne’e kontinua serbisu iha baze.

Guarda floresta iha funsionáriu 22, pekuária neen (6) ho totál 28 mak kontratu termina iha 31 dezembru 2023, maibé sira nafatin kontinua serbisu.

Entertantu, relatóriu fiskalizasaun komisaun D nian ne’e hetan ona aprovasaun ho unanimidade husi Deputadu membru komisaun D ho votu a-favór hitu (7), kontra no abstensaun zero, no parte meza PN liuhusi Prezidente Parlamentu Nasionál, Maria Fernanda Lay, hato’o ona distribuisaun iha reuniaun plenária iha 21 maiu ne’e, no haruka mós kópia ba Governu atu tau atensaun ba rekomendasaun husi komisaun D nian.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!