POLÍTIKA

Komisaun E rekomenda EDTL, E.P aselera projetu eletrifikasaun ba aldeia 15 iha Manufahi

Komisaun E rekomenda EDTL, E.P aselera projetu eletrifikasaun ba aldeia 15 iha Manufahi

Ekipa teknik EDTL kua kotu fiu no hadia hela eletrisidade iha pasar senggol, Foto/Tatoli.

DILI, 23 maiu 2024 (TATOLI)—Komisaun E ne’ebé trata asuntu Infraestrutura iha Parlamentu Nasionál (PN) rekomenda ba Eletrisidade de Timor-Leste, Empreza Públika (EDTL, E.P) atu aselera projetu eletrifikasaun ba aldeia 15 iha munisípiu Manufahi ne’ebé to’o ohin loron seidauk asesu liña eletrisidade.

“Rekomenda ba EDTL-EP atu aselera prosesu implementasaun Projetu Eletrifikasaun Nasionál (PEN) no Projetu Eletrifikasaun Komunitária (PEK) ba aldeia 15 iha munisípiu Manufahi, ne’ebé to’o ohin seidauk asesu ba enerjia elétrika,” haktuir relatóriu fiskalizasaun komisaun E ne’ebé Agência Tatoli asesu, kinta ne’e.

Rekomendasaun ne’e komisaun hato’o hafoin halo fiskalizasaun ba munisípiu Manufahi iha fulan-abríl tinan ne’e, ne’ebé lidera direta husi Prezidente Komisaun E, Marcos Xavier, akompaña ho Deputadu membru komisaun E nian.

Informasaun jerál munisípiu Manufahi jeográfikamente iha luan 1,325 kilométru kuadradu ho populasaun hamutuk 53,691 tuir sensu 2015 nian. Administrasaun munisipál Manufahi iha postu administrativu haat, suku 29 no aldeia 137.

Enkuantu, tuir dadus ne’ebé komisaun identifika durante iha fiskalizasaun ne’ebé hato’o husi  koordenador EDTL, E.P munisípiu Manufahi hodi relata katak munisípiu Manufahi iha suku hamutuk 29 no suku sira-ne’e asesu hotu ona ba enérjia eletrisidade no hela de’it aldeia  15 mak seidauk asesu ba enérjia eletrisidade.

Iha tinan 2022, Projetu Eletrifikasaun Nasionál (PEN) da-hitu (7) munisípiu Manufahi iha aldeia hotu mak iha hela PEN.

Postu administrativu Turiskai iha aldeia lima (5) mak seidauk bele asesu ba enérjia eletrisidade, tanba fator estrada ka estrada ladi’ak hodi bele asesu ba aldeia refere no postu administrivu Fatuberliu iha aldeia rua (2).

Hahú husi tinan 2022-2023, projetu eletrisidade ne’ebé aloka ba munisípiu Manufahi hamutuk pakote 23, husi totál pakote ne’e projetu 21 mak finaliza ona no komunidade asesu ona ba enérjia eletrisidade maibé hela de’it projetu rua (2) mak iha hela faze implementasaun.

“Problema ne’ebé mak EDTL, E.P hasoru iha terrenu mak liña media tensaun iha parte Wekakao nian tỉna-tinan sempre hetan estragu husi bee-mota, bainhira bee-mota estraga tiha poste riin tékniku EDTL, E.P normaliza tiha, maibé kuandu udan boot ne’e bee-mota estraga fila-fali,” relatóriu komisaun E ne’e haktuir

Iha parte seluk, EDTL, E.P munisípiu Manufahi menus ba funsionáriu, tanba haree ba teritoriál munisipiu ne’ebé boot no mós asesu estrada husi suku ba suku ho kondisaun aat, presiza tebes atu aumenta tan funsionáriu ka tékniku hodi destaka iha terrenu atu bele halo atendimentu ho lais bainhira mosu faillansu iha terenu.

Enkuantu, reseita ne’ebé EDTL, E.P rekolla iha tinan 2023 hamutuk $98,338.24 no iha tinan 2024 hahú husi fulan-janeiru to’o marsu ne’e rekolla ona $37,954.80.

Entretantu, relatóriu fiskalizasaun komisaun E nian ne’e hetan ona aprovasaun husi Deputadu membru komisaun no parte meza PN liuhusi Prezidente Parlamentu Nasionál, Maria Fernanda Lay, hato’o ona distribuisaun iha reuniaun plenária iha 21 maiu ne’e, no haruka mós kópia ba Governu atu tau atensaun ba rekomendasaun husi komisaun nian.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!