HEADLINE, KAPITÁL

MTK no ADB lansa Planu Mestre Transporte Públiku Timor-Leste

MTK no ADB lansa Planu Mestre Transporte Públiku Timor-Leste

Vise Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministru Transporte no Komunikasaun, Miguel Marques Gonçalves Manetelu, Diretora Nasionál ADB Timor-Leste, Stefania Dina no entidade relevante seluk halo lansamentu Planu Mestre Transporte Públiku Timor-Leste, iha Suai Room, Timor Plaza, kinta (23/05/2024). Imajen Tatoli/António Daciparu

DILI, 23 maiu 2024 (TATOLI)—Governu Timor-Leste liuhusi Ministériu Transporte no Komunikasaun (MTK) hamutuk ho parseiru internasionál Banku Dezenvolvimentu Aziátiku (ADB), kinta ne’e, lansa ona Planu Mestre Transporte Públiku Timor-Leste (PMTPTL).

“Objetivu lansamentu PMTPTL ho vizaun atu fasilita Timor-Leste atu kompetiza sai país atrativu ne’ebé iha transporte públiku asesível, inkluzivu no prepara ba futuru hodi apoiu kresimentu ekonómiku, dezenvolvimentu urbana no kualidade vida iha Timor laran tomak,” Ministru Transporte no Komunikasaun, Miguel Marques Gonçalves Manetelu, informa, iha Suai Room, Timor Plaza.

Inisitiva ne’e tanba Governu hakarak halo mudansa ba transporte públiku tanba transporte públiku ne’ebé mosu ho moda oin-oin, no eziste iha tinan barak nia-laran ona desde independénsia to’o ohin loron.

“Entre sira-ne’ebé ita hotu koñese hanesan taxi, mikrolet, angguna, mini-bus no bus mak opera hela durante ne’e, ita hotu hatene númeru transporte sira ne’e krexe loron ba loron. Nu’udar ministériu responsável ba transporte no komunikasaun iha IX Governu Konstitusionál, MTK halo ezersisiu hotu atu hadi’a, moderniza no dezenvolve liután setór transporte públiku hodi hatan ba demanda populasaun, no iha sorin seluk bele tulun kria kondisaun ba kreximentu ekonómiku país nian,” nia akresenta.

Notísia relevante : ADB halo hela estudu viabilidade moderniza sirkulasaun transporte terrestre

Ministru dehan, planu mestre ne’e barak maibé halo rezumu ba faze tolu implementasaun mak hanesan kurtu, médiu prazu no longu prazu.

ADB mós sei kontinua kedas ho estudu viabilidade no ikus mai sei prepara Detail Engineering Design (DED) ba nia implementasaun iha tinan sira tuir mai.

“Antes ramata agostu tinan ne’e, sira sei entrega rezultadu estudu viabilidade tanba husi estudu ne’e mak ita sei halo dezeñu no husi ne’e sei hatene nia kustu ba implementasaun sira tuir faze kurtu prazu, médiu prazu no longu prazu nian,” nia tenik.

Planu mestre ida-ne’e sai nu’udar roteiru transformativu ida ba setór transporte públiku iha Timor-Leste no hein katak iha períodu governasaun IX Governu Konstitusionál bele hatan ona dezafiu oin-oin ne’ebé país Timor-Leste infrenta durante dékada rua nia-laran.

Transporte públiku tenke orienta hasa’e kreximentu ekonómiku

Ministru Miguel Marques deskreve, planu mestre ne’e hatuur vizaun ida-ne’ebé dook, katak sei atrativu, asesível, no inklusivu ho moda transporta sira-ne’ebé atu apoiu ba kreximentu ekonómiku, dezenvolvimentu urbana, no hasa’e kualidade moris timoroan sira iha nasaun tomak.

“Ita-nia transporte públiku tenke orienta ba hasa’e kreximentu ekonómiku, hanesan transporte públiku neʼebé asesível ba ema hotu, transporte públiku ne’ebé halo sidade sai furak, orgnizadu no halo ema kontente atu hela iha sidade, transporte públiku ne’ebé sai preferénsia ba ema barak hodi redús daudaun ona utilizasaun transporte privadu, bele hamenus emisaun, no redús dezastre oin-oin ne’ebé ita la espera, no ikus liu transporte públiku ne’ebé ekonómiku, sustantável no kontribui ba mitigasaun mudansa klimátika,” nia reforsa.

Nune’e, planu mestre ne’ebé lansa ohin sei tulun hodi transforma sistema transporte públiku Timor-Leste nian, liuhusi transforma servisu no atendimentu, hafasil konetividade entre urbana ho rurál, entre Dili ho munisípiu no liu-liu tulun atu hadi’a liután fasilidade no instalasaun nesesária hodi fasilita servisu transporte públiku ho di’ak liu.

Ho planu mestre ida-ne’e mos sei fo énfaze hodi halo reforma nesesária iha regulamentu, hasa’e kapasidade servisu públiku sira-nian, tulun Governu atu hatene kustu investimentu ne’ebé presiza ba dezenvolve transporte públiku iha Timor-Leste.

Iha fatin hanesan, Diretora Nasionál ADB Timor-Leste, Stefania Dina, hateten, objetivu husi lansamentu PMTPTL hakarak hodi tulun nasaun atinje vizaun kona-ba sistema transporte públiku ida-ne’ebé iha futuru sei prepara hodi suporta kresimentu ekonómiku, dezenvolvimentu urbanu no kualidade moris iha nasaun laran tomak.

Dokumentu planeamentu ba tempu naruk ne’e fornese roteiru ida ba kresimentu no dezenvolvimentu transporte públiku lokál iha futuru.

“Planu mestre ne’e sei asegura katak ema iha asesu ba sistema transporte públiku ida-ne’ebé efisiente, seguru, inkluzivu, reziliente ba klima no sustentavel,” Diretora Nasionál ADB, tenik.

Planu mestre ne’e mós sei kontribui atu alkansa dezenvolvimentu ho karbonu ki’ik no kresimentu enerjia ne’ebé efisiente iha setór transporte, tuir Timor-Leste nia kontribuisaun nasionál determinadu 2022-2030.

Nia dehan, PMTPTL ne’e rasik sei fasilita transformasaun ba transporte públiku iha sidade laran no ba munisipiu liuhusi revizaun ba rute transporte públiku ne’ebé eziste, hadi’a instalasaun bus para fatin no terminál sira, no estabelese rota foun ba bus públiku sira.

Fó mós orientasaun ba organizasaun sira ne’ebé jere no opera sistema transporte públiku. Ida-ne’e hein katak sei hametin Dili nia pozisaun hanesan sidade kapitál nasaun nian, nu’udar sentru transporte, no mós hadi’a asesu ba servisu públiku no oportunidade ekonómiku ba timoroan sira liuhusi transporte públiku.

ADB iha kompromisu atu alkansa Ázia no Pasífiku ida-ne’ebé prósperu, inkluzivu, reziliente no sustentável, iha tempu hanesan mós atu sustenta ninia esforsu sira hodi halakon pobreza estrema. ADB harii iha tinan 1966, ho membru nasaun 68 no 49 husi rejiaun ne’e.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!