BOBONARO, 23 maiu 2024 (TATOLI)-Ministériu Agrikultura, Pekuária, Peska no Floresta liuhosi Sekretaria Estadu Floresta (SEF) ba oin sei kontinua dezenvolve Ai-Parapa ka magrove iha área kosteira sira hahú husi munisípiu Bobonaro to’o Lautém hodi konserva fila-fali ai-Parapa iha Timor-Leste.
Sekretáriu Estadu Floresta, Fernandino Vieira, hateten diresaun floresta iha programa importante ba reflorestasaun hodi promove, konserva Ai-Parapa iha tasi-ibun, tanba númeru ai-parapan hahú menus iha tinan hirak ba kotuk.
Notísia relevante: SEP selebra loron mundiál peska ho kuda ai-parapa
“Ita mós sei kontinua dezenvolve espésie ai-Parapa ne’ebé maka moris iha área josteira, tanba ita hatene katak Ai-Parapa ne’e ninia funsaun lubuk ida, la’ós de’it sai fatin ba ikan tolun, mas sai mós hanesan barreira ida atu salva ita nia illa Timor-Leste. Bazeia ba peskiza rai iha tasi laran ne’e tinan 100 tenke ser séntimu ida, tasi foti hela de’it, entaun ita Timor illa ki’ik ida, kuandu foti hela de’it tempu ida sei lakon,” nia hateten.
Nia hatutan, ai-parapa iha funsaun lubuk ida, sai fatin atu proteje ekosistema tasi hanesan ikan, kadiuk no seluk tan.
Nune’e mós proteje balada fuik sira hanesan manu no lekirauk, ai-Parapa mós hanesan barreira ida atu satan laloran tasi.
“Foin daudaun akontese iha Dili, tasi ne’e tama to’o estrada boot, la kleur Embaixada Amérika lakon, tasi mak foti tiha, lae Atabae ho Batugade mós laiha ona, tasi mak nakonu ona, entaun ita presiza dezenvolve Ai-Parapa,” nia informa.
Fernandino Vieira subliña, tinan oin sei kontinua halo espansaun ba Ai-Kameli iha área Manduki, suku Aidabaleten, postu administrativu Atabae, Munisípiu Bobonaro ne’ebé iha tinan hirak ba kotuk VII governu halo ona investimentu rai ho totál ekatre 155.
“Ita hakarak aumenta tan ba númeru ne’ebé boot hodi nune’e sai hanesan investimentu ne’ebé potensiál ba rikusoin nasaun nian, karik aban bainrua ita-nia ekonomia ne’e monu no ita problema mina no gás, ita sei iha reseita balu ne’ebe mak bele troka,” nia akresenta.
Enkuantu kada tinan governu liuhusi SEF produ ai-oan tokon ida, hodi distribui ba komunidade sira atubele dezenvolve sira-nia plantasaun floresta komunitária no indústria hodi hasa’e rendimentu ekonomia família iha futuru.
Notísia relevante: SEF hamutuk ho komunidade kuda ai-parapa 1000 iha tasi ibun Metinaro
Jornalista: Sérgio da Cruz
Editór: Evaristo Soares Martins
