POLÍTIKA

Komisaun F aprova redasaun finál alterasaun Estatutu Kombatente no hein submete ba PR

Komisaun F aprova redasaun finál alterasaun Estatutu Kombatente no hein submete ba PR

Komunidade lokál no veteranu sira partisipa iha komemorasaun restaurasaun independénsia ba da-XX, iha suku Afaloikai, sesta (20/05). Imajen Tatoli/Vitorino Lopes da Costa'

DILI, 24 maiu 2024 (TATOLI)—Komisaun F ne’ebé trata asuntu Saúde, Seguransa Sosiál no Igualidade Jéneru iha Parlamentu Nasionál (PN), sesta ne’e, halo apresiasaun no aprovasaun testu redasaun finál ba proposta-lei númeru 7/VI(1a)-alterasaun datoluk Lei Estatutu Kombatente Libertasaun Nasionál ho votu a-favór ualu (8), kontra no abstensaun zero, no sei submete ba Prezidente Repúblika.

Notísia Relevante: PN aprova alterasaun Estatutu Kombatente Libertasaun Nasionál iha finál globál

“Entaun, signifika redasaun finál hosi proposta-lei ne’e pasa iha komisaun F, no agora kontinua submete ba meza Prezidente Parlamentu Nasionál hodi kontinua envia ba Prezidente Repúblika (PR), hodi haree no halo promulgasaun ba lei ne’e,” Prezidente Komisaun F, Maria Gorumali Barreto, hato’o ba jornalista sira iha resintu Parlamentu Nasionál.

Iha konteúdu redasaun finál ne’e liuliu ba apresiasaun nian ne’e, Deputadu sira hadi’a de’it redasaun ne’ebé mak iha liuliu letra laiha espasu hodi hadi’a de’it.

Antes ne’e, iha 21 maiu 2024, PN liuhusi reuniaun plenária aprova proposta-lei númeru 7/VI(1a)-alterasaun datoluk Lei Estatutu Kombatente Libertasaun Nasionál iha finál globál ho votu a-favór 54, kontra 0 no abstensaun rua (2).

Antes aprovasaun finál globál, Deputadu sira diskute no aprova uluk pedidu rekerimentu re-abertura diskusaun ba proposta rua iha espesialidade plenária PN, hanesan proposta ba alterasaun artigu 25 pensaun espesiál subsisténsia.

Iha artigu 27, pensaun sobrevivénsia ho objetivu altera ho ninia redasaun orijinál hodi mantein iha Estatutu Kombatente Libertasaun Nasionál ne’ebé aprezenta husi Deputadu PLP, Helder Freitas.

Enkuantu, iha 15 Maiu liu-bá, Komisaun F trata asuntu Saúde, Seguransa Sosiál no Igualidade Jéneru iha PN, halo apresiasaun no aprovasaun relatóriu diskusaun no votasaun espesialidade  ba proposta-lei ne’e.

Relatóriu ne’e mai husi diskusaun faze espesialidade ne’ebé mak realiza iha loron tolu iha semana kotuk iha munisípiu Liquiça.

Durante diskusaun iha espesialidade, Deputadu sira iha komisaun aprezenta proposta hamutuk 22 mak pasa, ida-ne’e ko’alia kona-ba ninia objetu husi proposta-lei liuliu ba iha situasaun ida-ne’e mak ko’alia kona-ba patriota libertasaun nasionál ne’ebé konsidera mós vítima ba tempu pasadu ninian.

Iha artigu seluk kona-ba prestasaun sobrevivente no mós ho prestasaun pekunária úniku ne’ebé mak ko’alia subsídiu ba iha veteranu sira-ne’ebé mak halakon tiha uma lisan, maibé se kuandu nia feen no oan simu kuandu laiha ona entaun la presiza ba iha uma lisan, maibé fila-fali ba kofre Estadu, no aleinde artigu sira seluk ne’ebé pasa iha espesialidade.

Antes ne’e, iha 29 abríl tinan ne’e, PN liuhusi reuniaun plenária aprova  proposta-lei númeru 7/VI(1a), alterasaun datoluk lei númeru 3/2006, 12 abríl  kona-ba Estatutu Kombatente ba Libertasaun Nasionál iha faze jeneralidade ho votu a-favór 39, kontra zero no abstensaun 19.

Iha diskusaun jeneralidade, Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soro” ne’ebé aprezenta proposta-lei númeru 7/VI(1a) , alterasaun datoluk lei númeru 3/2006, 12 abríl  kona-ba Estatutu Kombatente ba Libertasaun Nasionál, hakarak altera artigu hamutuk 15 iha lei vijente.

“Iha loron 25-26 janeiru 2024 ministériu halo ona konsultasaun aberta ho estrutura KKLN nasionál no munisipál nu’udar órgaun úniku reprezentante husi kombatente, nune’e  ministériu submete no aprezenta proposta alterasaun ba artigu sira  hanesan artigu 3, 10, 11, 12, 13, 15, 18, 27, 28, 35 no revoga artigu 17 Komisaun Omenajén nune’e reajusta husi artigu 8, 15, 18, 31, 32 no ikus liu hasai letra eis iha artigu 38 husi Estatutu Kombatente hodi hetan apresiasaun husi Konsellu Ministru antes lori mai uma-fukun Parlamentu Nasionál,” nia hateten

Nu’udar baze ba implementasaun, tanba ne’e hahú iha tinan 2006 ita komesa halo ona validasaun ba kombatente no mártir hamutuk rihun 7668 tuir grau ida-idak.

Husi númeru ne’e, hamutuk ema benefisiáriu ba pensaun kombatente no mártir hamutuk 28.281, iha mandatu Governu da-sia ba fim tinan 2023 finaliza verifikasaun dadus tinan 2009, ne’ebé ho nia totál rejistu hamutuk 124.680 rekerente.

Ida-ne’e, hein validasaun finál sei rezolve mós dadus pendente no reklamasaun husi primeriu rejistu hamutuk rihun 10.391 no iha periódu mandatu ida-ne’e sei kontinua halo abertura rejistu datoluk hodi konklui.

Maibé, nia dehan, iha periódu ida-ne’e mós mosu lamentasaun barak husi komunidade kona-ba dadus veteranu, tanba ne’e iha mandatu Governu Konstitusionál da-sia identifika problema barak kona-ba falsifikasaun dadus, prizaun, sertidaun óbitu no seluk tan, rekuiñesimentu baze apoiu estatutu kombatente sira ne’ebé mate iha ai-laran no iha vila, diskriminasaun ba determinasaun husi estrutura diretiva sira kona-ba dedikasaun ou eskluzividade, la rekoñese estudante no eis funsionáriu sira-ne’ebé uluk kontribui mós ba luta maibé balun simu hela  pensaun.

Família sira husi kombatente falesidu sira ezije rejistu no asesu pensaun no problema ekonómia sira seluk, aleinde ne’e ita-nia inan feton sira ne’ebé uluk hetan violasaun tanba hakarak defende interese ukun-an ikus mai sosiedade ida ne’e prega liafuan ba sira hanesan vítima no esplora ba nia istória no hodi sai ba konsumu públiku, ida ne’e nu’udar Estadu la permite, tanba halo intimidasaun ba ema nia psikolójia no nia dignidade, ikus família sira sente moe no hirus.

Nune’e, ho hanoin ida-ne’e katak lei tenke fó fatin ba sira hodi dignifika sira-nia terus nu’udar kontribuisaun ba luta no hodi bele permite armónia sosiál no estabilidade polítika nasionál,

“Proposta alterasaun ne’e kumpre ba kompromisu programa Governu Konstitusionál da-sia hodi rezolve preokupasaun sira husi kombatente no família mártir libertasaun nasionál, ho objetivu atu rekoiñese estudante no eis funsionáriu sira-nia kontribuisaun, valoriza  inan feton sira-nia sofrimentu ho estatutu nu’udar patriota libertasaun nasionál. Kontrola rekomendasaun ba dedikasaun eskluziva tenke bazeia ba partisipasaun la’ós ona ho determinasaun husi estrutura sira sempre mate iha baze apoiu no durante rezisténsia hodi define sira-ne’ebé mate,” nia hateten.

Tanba, nia dehan, inimígu fó dalan ba família husi kombatente falesidu hodi rejistu determina direitu ba pensaun sobrevivénsia, rekoiñese baze apoiu ba direitu prestasaun pekunária únika  3-7, atribui pensaun pekunária únika ba família kombatente felesidu ne’ebé la konsege simu sira-nia direitu,” nia dehan.

Proteje investimentu fundu veteranu ne’ebé dezenvolve husi Konsellu Kombatente Libertasaun Nasionál (KKLN) nu’udar kontribuisaun ba prosesu dezenvolvimentu sustentável tuir prinsípiu libertasaun ba povu.

Enkuantu tuir, textu orijinál iha Proposta-lei númeru 7/VI(1a), alterasaun datoluk lei númeru 3/2006, 12 abríl, kona-ba Estatutu Kombatente ba Libertasaun Nasionál atu altera artigu 3, 8, 10, 11, 12, 13, 15, 18, 27, 28, 31, 32, 35 no 38.

Jornalista : Nelson de Sousa

Editór       : Cancio Ximenes  

iklan
iklan

Leave a Reply

iklan
error: Content is protected !!