DILI, 24 maiu 2024 (TATOLI) – Vise Primeiru-Ministru no Ministru koordenadór Asuntu Ekonómiku no Ministru Turizmu no Ambiente, Francisco Kalbuadi Lay, hateten Governu la sosa foos, iha tinan ida-ne’e, tanba estoke sufisiente.
“Iha tinan ida-ne’e, ita seidauk hola tan foos, tanba ita-nia foos iha hela armajen CLN sufisiente, no mós iha setór privadu sira mós estoke iha hotu, entaun ita atu intervene presu ba merkadu, ita labele halo, tanba ita adapta merkadu livre, maibé Governu iha hanoin ida katak empreza sira labele faan sa’e liuba 8%”, Francisco Kalbuadi Lay, informa ba iha nia servisu fatin, Farol, ohin.
Nia rekoñese, iha setór privadu ida ka rua ne’ebé faan foos ho folin sa’e nafatin iha merkadu, tanba ne’e nia husu atu labele halo manipulasaun tanba folin loloos mak $17, maibé sira faan fali iha kioske sira ba $21.
“Rai ida-ne’e, ita setór privadu sira faan folin sa’e liu, ita labele kontrola to’o ba baze, iha ne’ebé de’it, ezemplu ita rona iha Baucau ema faan saku ida ba $21, maibé loloos folin $17, entaun ida-ne’e fatin balun akontese nafatin manipulasaun ba folin foos sira”, nia esplika.
Nia rekorda, foos folin karun tebes, iha tinan uluk, tanba ne’e Governu fo subsídiu ba setór privadu ka empreza lima no ikus mai empreza tolu mak konsege hetan subsídiu, empreza rua seluk la konsege tanba sira mós foos estoke laiha.
“Ita boot sira hatene, folin foos ne’e laos iha ne’e mak karun, maibé merkadu iha mundu mós folin karun tanba ne’e situasaun jeopolítika agora, mina folin komesa sa’e, la kleur foos folin sei sa’e tan, tanba ne’e ha’u rasik antisipa ida-ne’e iha semana oin ha’u halo reuniaun ho diretór sira atu rezerva fali foos balun, tanba ita agora iha fulan-Maiu atu tama ba juñu, ho orsamentu ne’ebé mak iha CLN atu rezerva to’o iha fulan-Dezembru mai”, nia konklui.
Jornalista : Felicidade Ximenes
Editór : Zezito Silva
