MP alega prizaun preventiva ba arguidu nain-hitu ne’ebé hadau telefone hodi hamate Nituchia Fangidae
DILI, 26 maiu 2024 (TATOLI)-Tribunál Judisiál Primeira Instansia Dili (TJPID), domingu (26/05) ohin, hala’o Interrogatóriu dahuluk ba krime furtu agravadu ne’ebé envolve hosi arguidu nain hitu ne’ebé hadau telefone hodi halakon Nituchia Fangidae nia-vida.
Arguidu nain hitu ne’e envolve iha krime furtu agravadu hodi hadau sidadaun feto ida nian telefone iha área Kampung Alor, bainhira sidadaun feto ne’e kondús motorizada hodi tula nia oan hosi Kampung Alor, derepente arguidu nain ha’at ho motór rua hosi sidadaun feto ne’e nia kotuk hodi hadau telefone, nune’e sidadaun ne’e ho nia oan Nituchia Fangidae duni tuir arguidu sira atu foti hikas sira nian telefone. Maibé to’o iha área Praia dos Coqueiros ka loja Seara nia oin, vítima hetan asidente trafégu.
Ho aktu arguidu nain haat ne’e nian, rezulta sidadaun feto ho nia oan Nituchia Fangidae ho motór monu ba rai to’o Nituchia lakon vida no nia inan hetan kanek grave tanba monu ho pankada maka’as.
Hafoin kazu ne’e ho PNTL buka tuir autór sira no konsege detein ema nain hitu.
Durante iha prosesu interrogatóriu dahuluk ba arguidu nain hitu ne’e, Ministériu Públiku ne’ebé reprezenta hosi Prokuradór Renato Bernahac, promove arguidu sira ho krime furtu agravadu artigu 256 no krime roubo ne’ebé previstu iha artigu 257 hosi Kódigu Penál Timor-Leste.
Iha prosesu alegasaun, Ministeriu Públiku husu ba Tribunál atu aplika Prizaun Prventiva ba arguidu nain-hitu, tanba faktu provadu katak arguidu sira asaun ne’e rezulta ema mate.
Maibé parte Defeza hosi arguidu sira husu ba Tribunál atu aplika medida koasaun Aprezentasaun Periódika.
Rona tiha parte hotu, Tribunál liuhosi Juiz Turnu Afonso Carmona, deside Interrogatóriu dahuluk ne’e adia fali ba segunda (27/5) oras 11:00 dader hodi hatún despaixu ikus ba arguidu nain hitu ne’e.
Prosesu Primeiru Interrogatóriu ne’e prezide hosi Juiz Turnu Afonso Carmona, Ministériu Públiku reprezenta husi Prokuradór Renato Berenahac, arguidu sira hetan asisténsia legál husi Defensór Públiku nain-ida no Advogadu Privadu nain-tolu.
Notísia relevante:Ekipa asegura tán suspeitu na’in-lima hadau telefone
Jornalista: Natalino Costa
Editór: Florencio Miranda Ximenes
