HEADLINE, INKLUZAUN SOSIÁL

CNC, I.P no PDHJ rona sasin kona-ba situasaun Myanmar

CNC, I.P no PDHJ rona sasin kona-ba situasaun Myanmar

Audiénsia públika kona-ba situasaun Myanmar, iha salaun CNC, I.P, Balide, segunda (27/05/2024). Imajen/CNC

DILI, 27 maiu 2024 (TATOLI)Centro Nacional Chega, Institutu Públiku (CNC,I.P) hamutuk ho Provedoria Direitu Umanu no Justisa (PDHJ, sigla portugés), segunda ne’e, realiza audiénsia públika hodi rona informasaun husi vítima sira-ne’ebé fó sasin kona-ba situasaun iha Myanmar.

Eventu ne’e CNC, I.P no PDHJ hamutuk ho grupu organizasaun husi Myanmar, Filipina, Malázia no Tailándia hanesan Progressive Voice, Asian Forum for Human Rights and Development (FORUM-ASIA), Alternative ASEAN Network on Burma (ALTSEAN-Burma), and Initiatives for International Dialogue (IID) hodi haree mekanizmu fó kontribuisaun solidaridade ida ba Movimentu Demokrasia iha Myanmar.

“Ita hotu hatene, Myanmar tinan barak ona to’o agora kontinua moris iha rejime militár nia liman ne’ebé mak rezultadu husi eleisaun demokrátiku ne’e viola tiha, agora militár mak kaer ukun. Nomós movimentu demokrasia ne’ebá kuaze parradu, ativista barak mak sira kaer sai dadur no populasaun Myanmar barak mak sai vítima,” Diretór Ezekutivu CNC, I.P, Hugo Maria Fernandes, hateten, iha CNC Balide, segunda ne’e.

Nia dehan, bainhira refleta Timor-Leste nia istória rasik, hatudu liuhusi líder boot sira hanesan atuál Prezidente Repúblika, José Ramos Horta, Primeiru-Ministru, Kay Rala Xanana Gusmão no seluk tan, ne’ebé sempre buka fó apoiu solidaridade ba povu sira-ne’ebé luta hela ba demokrasia no defende direitu umanu.

Tanba ne’e, CNC, I.P no PDHJ nu’udar entidade Estadu nian, haree katak deklarasaun de’it la to’o atu hatudu Timor-Leste nia solidaridade ba povu Myanmar, nune’e realiza audiénsia públika kona-ba krize direitu umanu iha Myanmar atu rona rasik ativista direitu umanu husi Myanmar ne’ebé sai vítima husi tortulasaun Militár sira, nune’e sira bele konta oinsá mak povu hasoru violasaun

“Ita luta naruk hetan ukun rasik-an tanba hetan solidaridade husi nasaun barak, tanba ne’e bainhira ita ukun-an ona tenke hatudu fali ita-nia solidaridade ba sira-ne’ebé presiza ita-nia tulun,” nia akresenta.

Ekipa ne’ebé ohin partisipa iha eventu ne’e sei hasoru Primeiru-Ministru no Prezidente Repúblika.

“Sira mai atu apreende, partikularmente sira-nia ekipa rua sei hamutuk ho CNC, I.P apreende oinsá mak kontinua halo atividade hodi defende no promove direitu umanu inklui tulun vítima sira.

Notísia relevante : PM Xanana husu solidariedade internasionál apoia povu Myanmar hetan liberdade

Iha fatin hanesan, Provedór Direitu Umanu no Justisa, Virgílio Guterres, hateten, audiénsia públiku ne’e atu rona maluk sira-ne’ebé durante ne’e halo advokasia ba direitu umanu iha Myanmar, ne’ebé sira mai hanesan amigu.

“Sira mós uluk apoiu ba Timor-Leste nia luta ba independénsia. Entaun ita konvida estudante no sosiedade sivíl hodi mai partisipa audiénsia ne’e hodi sira bele rona no hatene situasaun Myanmar nian. Ho razaun prinsipál ita hotu hatene aleinde ita pro ba situasaun Myanmar, entaun ita hakarak hatene tanba ita-nia relasaun ho Myanmar mós ladun di’ak hahú tinan-rua liubá bainhira Estadu ka Governu Myanmar duni sai ita-nia diplomata sai husi ne’ebá,” nia tenik.

Situasaun sira ne’e hodi buka hatene saida loos mak akontese iha Myanmar, tanba ne’e liuhusi audiénsia ohin ne’e sira bele konta situasaun iha ne’ebá no bele apreende esperiénsia husi Timor-Leste hodi tulun maluk ativista sira seluk iha Myanmar.

“Parte PDHJ nian kontinua fasilita maluk sira ne’e husi parte direitu umanu nian tanba ita-nia artigu 10 hateten, povu Timor solidáriu ba povu seluk ne’ebé luta ba autodeterminasaun, entaun povu Timor-Leste iha direitu atu hatene ita-nia relasaun ho nasaun sira seluk, la sakrifika ita-nia prinsípiu atu defende direitu umanu no demokrasia,” Provedór reforsa.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!