Deputada CNRT husu Governu fó atensaun estrada ba Bee-Manas Marobo

DILI, 27 maiu 2024 (TATOLI)—Deputada CNRT, Maria Gorumalli Barreto, husu Governu liuhusi Ministériu Obra Públika (MOP) atu fó atensaun estrada ba fatin turizmu Bee-Manas Marobo iha suku Ilatlaun, postu administrativu Bobonaro, munisípiu Bobonaro.
Notísia Relevante: Governu presiza reabilita kondisaun infraestrutura iha Bee-Manas Marobo
“Ha’u hakarak foti asuntu ida husi suku Marobo ne’ebé kompleksu, liuliu komunidade foti problema kona-ba Bee-Manas iha Ilataun katak, kondisaun estrada ne’ebé mak tama ba fatin ne’e iha ponte rua mak aat, entaun difikulta vizitór sira labele to’o iha fatin ne’eba,” nia levanta liuhusi reuniaun plenária Parlamentu Nasionál, segunda ne’e.
Tanba ne’e, nia husu Governu karik iha tinan ne’e la disponível bele tau prioridade iha Orsamentu Jerál Estadu (OJE) 2025, tanba Bee-Manas Marobo hanesan fatin ida poténsia tebes no ema ne’ebé mak moras bele ba haris iha ne’eba liuliu moras kulit no isin-moras bele kura.
Ho ida-ne’e, nia dehan, iha vizitór barak husi fatin seluk bele hakat to’o ba iha suku Ilatlaun, postu administrativu Bobonaro, munisípiu Bobonaro hodi haree no sente Bee-Manas Maromak nia kmanek.
Deputada CNRT, Carminda Carlota, mós sekunda katak Bee-Manas Marobo sai fatin potensiál tebes sai sítiu turístiku, nune’e presiza duni tau atensaun ba kondisaun estrada tanba daudaun ne’e kondisaun dalan ba fatin ne’e ladi’ak.
Deputadu PD, Armando Lopes, husu Governu da-sia (9) atu tau matan ba estrada iha kapitál munisípiu Lautém tanba desde uluk to’o agora sei kontinua ateru ho rai-mutin, nune’e tempu udan ne’e hamosu taho barak.
Deputada FRETILIN, Mariquita Soares, foti preokupasaun ponte ida iha Uma-Tolu Viqueque ne’ebé daudaun ne’e kondisaun aat povu labele asesu lori produtu ba merkadu tanba ne’e husu ba Ministériu Obra Públika (MOP) urjente tau atensaun.
Vise Ministru ba asuntu Parlamentár, Adérito Hugo da Costa, rejista preokupasaun husi Deputadu sira-ne’e hafoin sei enkamiña ba ministériu tutela.
Notísia Relevante: Infraestrutura bázika iha Bee-Manas Marobo la funsiona
Jornalista : Nelson de Sousa
Editór : Cancio Ximenes

