COVALIMA, 27 Maiu (TATOLI) – Servisu Edukasaun Covalima husu ba diretór no koordenadór eskola sira atu halo kontrolu ida rigór ba implementasaun Programa Merenda Eskolár husi ekipa jestaun programa (EJP), nune’e bele fó hahán ba alunu sira tuir menú programa nian.
“Ha’u hatene katak implementasaun merenda eskolár la’os ita-boot sira mak jere, maibé husi ekipa jestaun programa. Ita-boot sira iha responsabilidade atu kontrola. Merenda eskolár presiza fó ai-han ba alunu sira atu haforsa, haburas no proteína hodi kompleta malu”, Diretora Servisu Edukasaun Covalima, Elda de Fátima, afirma ohin.
Tuir observasaun, iha eskola bázika balun ne’ebé seidauk bele fó sai naran fó hahán ba labarik sira la tuir menú hanesan hudi-da’an no modo-budu. Tanba ne’e, dirijente edukasaun fó xamada ba diretór eskola sira atu presta atesaun másima hodi kontrola ekipa jestaun programa tanba sira aprezenta razaun katak laiha stock ai-han atu fornese ba alunu sira.
Iha implementasaun merenda eskolár antes ne’e, kada estudante iha direitu han sentavu 0,25 loroloron, maibé agora estudante ida iha direitu han sentavu 0,42 tanba alokasaun orsamentu ba programa ne’e iha 2024 hamutuk $1.016.964,48.
Iha sorin seluk, Diretór EBC Ogues, Saturnino Barros, reforsa katak diretór eskola sira hetan orientasaun ne’ebé rigoroza husi Servisu Edukasaun Covalima tanba haree ba nia orsamentu ne’ebé boot.
Saturnino Barros garante katak nia sei garante implementasaun programa ne’e no kumpre orientasaun husi Edukasaun Covalima no Prezidente Autoridade Munisipál.
Bainhira ekipa jestaun programa fó han alunu la tuir menú maka diretór eskola sira iha responsabilidade atu fó xamada no troka hahán ne’ebé la nutritiva.
Iha 13 Maiu, Servisu Edukasaun Covalima lansa ona Programa Merenda Eskolár iha Eskola Bázika Sentral Suai Loro. Programa ne’e implementa iha eskola 148 ho totál alunu hamutuk 17.804, husi eskola pré-eskolár 1.787 no ensinu báziku sentrál 16.017.
Iha implementasaun PME iha 2023, Covalima devolve orsamentu hamutuk $167.114,65 ba kofre Estadu.
Notísia relevante: Diretór eskola no EJP partisipa formasaun kona-ba jestaun ba PME
Jornalista: Celestina Teles
Editora: Maria Auxiliadora
