Embaixadór Brazíl agradese Estadu TL ne’ebé apoia donativu millaun $4

DILI, 27 maiu 2024 (TATOLI) – Embaixadór Brazíl iha Timor-Leste, Maurício Medeiros de Assis, segunda ne’e, hasoru malu ho Prezidente Repúblika José Ramos Horta, hodi hato’o agradesementu ba Estadu liuhusi Governu Timor-Leste ne’ebé ho domin apoia donativu millaun $4 atu bele rezolve situasaun balun iha períodu emerjénsia hafoin hetan inundasaun.
“Ha’u aproveita oportunidade ne’e hodi agradese ba Governu Timor-Leste no nasaun ne’ebé reprezenta husi Prezidente ba doasaun ne’ebé halo ba vítima sira husi inundasaun ne’ebé akontese iha Brazíl semana rua liubá. Ida ne’e hanesan doasaun ida-ne’ebé jenerozu ne’ebé reflete domin ne’ebé Timoroan sira iha ba Brazileiru sira,” Embaixadór ne’e hatete ba jornalista sira hafoin remata enkontru ho Xefe Estadu iha Palásiu Prezidensiál Dili, segunda ne’e.
Diplomata Brazileiru ne’e mós halo despedida ho Xefe Estadu tanba mandatu hanesan diplomata iha Timor- Leste termina ona.

Iha ámbitu despedida ne’e, lider na’in rua halo revizaun ba projetu kooperasaun oin-oin ne’ebé dezenvolve ona entre nasaun rua no ko’alia liu kona-bá relasaun bilaterál ne’ebé forte durante períodu hirak-ne’e.
Sorumutu ne’e mós fó oportunidade atu esplora kolaborasaun iha futuru, liuliu iha área edukasaun no dezenvolvimentu nasionál.
“Ami iha projetu ida ho Ministériu Edukasaun ba Formasaun Mestre Eskola Téknika Vokasionál. Mestre Brazileiru na’in sanulu-resin-rua sei mai iha Timor-Leste iha fulan-jullu ida-ne’e,” nia katak.
Antes taka dada lia ho jornalista sira Embaixadór ne’e tenik, “Ha’u kontente tebes iha Dili, ha’u-nia família no ha’u, no ami sei saudades tebes fatin ne’e. Obrigadu barak.”
Notísia relevante:Governu aprova millaun $4 apoia vitíma inundasaun iha Brazíl
Jornalista: Hortencio Sanchez
Editór: Florencio Miranda Ximenes

