EDUKASAUN, HEADLINE

ME konfirma dadus husi edukasaun munisipál molok distribui karteira eskolár

ME konfirma dadus husi edukasaun munisipál molok distribui karteira eskolár

Diretór Nasionál Infraestrutura no Edukativu iha Ministériu Edukasaun, Hélio Lopes. Imajen/Tatoli

DILI, 27 maiu 2024 (TATOLI)—Relasiona ho preokupasaun eskola nian katak menus karteira eskolár (meza no kadeira) iha eskola sira iha territóriu, nune’e Ministériu Edukasaun (ME) molok distribui, sei konfirma ho dadus husi servisu edukasaun munisipál.

“Ministériu Edukasaun sei la distribui tuir pedidu, maibé sei konfirma ho dadus ne’ebé mak iha tanba eskola balun kadeira no meza iha no di’ak hela, maibé husu tan foun, ministériu sei la fó. Uza lai ida-ne’ebé mak di’ak hela,” Diretór Nasionál Infraestrutura no Edukativu ME, Hélio Lopes, informa ba Agência Tatoli, iha ninia knaar fatin, Vila Verde, segunda ne’e.

Nia dehan, ME sei distribui fasilidade ne’e bainhira a’at no labele uza ona, “Ida-ne’ebé di’ak hela, bele uza lai nune’e tempu ruma mak fó fali.”

Notísia relevante : ME distribui karteira eskolár 8000-resin ba eskola 100-resin iha semana oin

Ministériu tinan ne’e sei sosa tan karteira eskolár hamutuk 9.000 to’o 10.000, hodi responde ba eskola ne’ebé sei menus.

“Inklui eskola sira-ne’ebé mak ita sei halo sala foun iha tempu oin mai, maibé eskola balun hetan ona karteira eskolár iha tinan-2022 no foin lalais ita hola tan 8.000, enkuantu hirak ne’ebé ita distribui ona no sei sosa tan 9.000 to’o 10.000-resin hodi distribui ba eskola sira-ne’ebé sei presiza,” nia akresenta.

Antes ne’e, Diretór Eskola Sekundáriu Ensinu Tékniku Vokasionál (ESTV) 28 novembru Becora, Manuel Amaral hateten iha ninia eskola sei falta kadeira no meza tanba hirak ne’ebé iha maioria a’at ona.

“Tanba ita-nia kadeira ho meza kuaze a’at no meza mak barak laiha, tanba ne’e ita husu ba Ministériu Edukasaun atu tau atensaun ba kadeira ho meza nune’e bele ajuda ita-nia estudante ba prosesu aprendizajen,” nia tenik.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!