Top

Presiza fó sansaun forte ba suspeitu sira hadau telefone

PNTL asegura suspeitu na’ in-rua (2) ne’ebé hadau komunidade nia telefone ne’ ebé rezulta labarik Nituchia Fangidae lakon vida. Imajen/TATOLI.

DILI, 27 maiu 2024 (TATOLI)—Membru Parlamentu Nasionál (PN) liuhusi Deputadu CNRT,  Francisco da Costa ‘Ikulay’, preokupa ho membru grupu organizadu sira-ne’ebé na’ok ema seluk nia sasán no hadau telefone iha kapitál Dili, nune’e autoridade kompetente presiza fó sansaun forte ba suspeitu sira.

Notísia Relevante: MP alega prizaun preventiva ba arguidu nain-hitu ne’ebé hadau telefone hodi hamate Nituchia Fangidae

“Ha’u iha preokupasaun kona-ba problema sempre akontese iha Dili laran, ne’ebé maiória ne’e envolve husi menoridade mak sempre hamosu problema. Nune’e mós meoridade sira-ne’e sirkula iha Dili laran hodi na’ok motor, hadau telefone to’o hamate ka halakon mós ema-nia vida. Ha’u hanoin lei ne’e proteje duni ba menoridade sira, maibé dalabarak mós ida repetitivu halo problema lori ba polísia, depois husik fali mai sira mak kontinua hamosu problema ida-ne’e. Hanoin lei ida-ne’ebé fó protesaun ba menoridade entre tribunál no polísia Governu tenke haree hikas fali karik,” nia levanta liuhusi reuniaun plenária Parlamentu, segunda ne’e.

Nia dehan, iha lei ida proteje menoridade sira, maibé justru menoridade ne’e mak sempre hamosu polémika ba Timor-Leste no sosiedade tomak.

“Entaun, tenke regula lei oan balun para inan-aman tenke responsabiliza mós, tanba laiha atensaun ba oan sira ne’e,” nia hateten.

Antes ne’e, Deputadu membru Komisaun B ne’ebé trata asuntu Negósiu Estranjeiru, Defeza ho Seguransa iha Parlamentu Nasionál, Natalino dos Santos, husu ba Polisia Nasionál Timor-Leste (PNTL) atu investiga membru grupu organizadu sira-ne’ebé daudaun ne’e hadau sidadaun sira-nia telefone no sasán sira seluk iha kapitál Dili.

“Ha’u hakarak husu ba PNTL, tanba sidadaun barak sente la seguru bainhira halo movimentu iha loron no kalan, tanba naokten barak tebes. Ita triste rona dehan, iha na’ok-teen na’ok señora ida-nia telefóne, nune’e señora ne’e ho nia oan duni tuir to’o hetan dezastre rezultadu nia oan mate no inan mós mate,” nia hateten ba jornalista sira iha resintu Parlamentu.

Nune’e, Deputadu husi membru komisaun B ne’e husu PNTL atu halo vijilánsia no tau atensaun ba fatin sira-ne’ebé identiku risku ba na’ok-teen sira atu hadau telefóne tenke kontrola másimu hodi halo patrollamentu.

Nia husu atu fó sansaun ba autór sira no mós atu halo investigasaun tanba haree situasaun ne’e krime organizadu iha fati-fatin halo populasaun pániku.

PNTL iha dever atu halo patrollamentu durante oras 24 no husu autoridade lokál sira atu serbisu  hamutuk ho  Ofisiál Polísia Suku (OPS) hodi nune’e karik identifika nia komunidade balun mak komete aktu hanesan ne’e bele hato’o kedas ba autoridade seguransa atu bele halo identifikasaun.

Enkuantu, iha 26 maiu ne’e, Tribunál Distritál Dili (TDD), hala’o interrogatóriu dahuluk ba krime furtu agravadu ne’ebé envolve husi arguidu na’in-hitu (7) ne’ebé hadau telefone hodi halakon Nituchia Fangidae nia vida.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!