iklan

EDUKASAUN, HEADLINE

Projetu konstrusaun eskola tinan-2021, falta 14 mak seidauk finaliza

Projetu konstrusaun eskola tinan-2021, falta 14 mak seidauk finaliza

Diretór Nasionál Infraestrutura no Edukativu iha Ministériu Edukasaun, Hélio Lopes. Imajen/Tatoli

DILI, 27 maiu 2024 (TATOLI)—Projetu komunitáriu ba kategoria konstrusaun eskola iha tinan-2021 nian, husi pre-eskolár to’o ensinu sekundáriu falta 14 mak seidauk finaliza.

“Projetu ne’ebé ita finaliza ona iha tinan-2024 nia-laran, liu-liu projetu ba tinan 2021 ho 2023 nian, kuaze 188 mak finalizadu maibé falta projetu 14 mak seidauk. Projetu 14 seidauk finaliza tanba kestaun iklima, ne’ebé la asesu ba estrada. Ida-ne’e sai difikuldade ida hodi finaliza tarde,” Diretór Dirasaun Nasionál Infraestrutura no Edukativu iha Ministériu Edukasaun (ME), Hélio Lopes, informa ba Agência Tatoli, iha ninia knaar fatin, Vila Verde, segunda ne’e.

Iha tinan-2021 iha projetu kapitál dezenvolvimentu no realiza husi kontratór sira hamutuk 21, ne’ebé ninia progresu fíziku 14 ne’e finaliza, enkuantu projetu hitu mak seidauk.

“Tanba ne’e, Ministériu Edukasaun husu nafatin kontratór atu finaliza tuir tempu ne’ebé iha,” nia akresenta.

Notísia relevante : Projetu komunitáriu ba eskola 11 Viqueque hahú faze implementasaun

Diretór ne’e informa, projetu tinan-2021 ne’ebé implementa iha Dili rasik maioria finaliza ona, enkuantu iha munisípiu sira hanesan Aileu, Baucau, Liquiçá, no Manatuto barak mak finaliza ona, balun seidauk finaliza, nune’e tempu badak sei finaliza hotu.

ME aloka orsamentu millaun $10-resin iha tinan-2023 hodi implementa projetu 116, ne’ebé ninia ptogresu to’o ona 30%, enkuantu iha tinan-2021 aloka millaun $20.

Ministériu fó prioridade ba implementasaun projetu 21 iha tinan-2024, ne’ebé foin mak inisia prosesu iha aprovizionamentu tanba foin hetan verifikasaun finál hosi Ajénsia Dezenvolvimentu Nasionál (ADN), no submete ona 17 ba ministériu, enkuantu haat mak seidauk, ne’ebé sei halo prosesu uluk ba projetu 17 ne’e.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!