HEADLINE, MUNISÍPIU, OÉ-CUSSE (RAEOA), SAÚDE

Assanami lansa programa nutrisaun integrada iha Oé-Cusse

Assanami lansa programa nutrisaun integrada iha Oé-Cusse

Vise Primeiru-Ministru, Ministru Koordenadór Asuntu Sosiál, Dezenvolvimentu Rurál no Abitasaun Komunitária, Mariano Assanami Sabino, tersa ohin, lansa programa nutrisaun integrada iha suku Lifau, sub-rejiaun Pante Makasar atu kombate kazu má-nutrisaun iha Rejiaun Administrativa Espesiál Oé-Cusse Ambeno (RAEOA). Imajen Tatoli/Abílio Elo Nini.

OÉ-CUSSE, 28 maiu 2024 (TATOLI) – Vise Primeiru-Ministru, Ministru Koordenadór Asuntu Sosiál, Dezenvolvimentu Rurál no Abitasaun Komunitária, Mariano Assanami Sabino, tersa ne’e lansa programa nutrisaun integrada iha suku Lifau, sub-rejiaun Pante Makasar atu kombate kazu má-nutrisaun iha Rejiaun Administrativa Espesiál Oé-Cusse Ambeno (RAEOA).

“Husu ba Atoni-oan sira ohin ita halo lansamentu dezafiu ba Oé-Cusse oan sira no ita hotu, tanba Timor-Leste hetan markasaun ladi’ak, tanba stanting iha 47%, maibé ne’e dezafiu mós ba UNICEF, WHO, ajénsia internasionál sira no grupu asosiasaun ne’ebé fó apoia ba individu sira, ita hamutuk halo istória ba Timor, sei ita lakonsege rezolve, entaun ita hamutuk seidauk susesu, husi Governu to’o parsériu sira,” Mariano Assanami Sabino, ko’alia iha suku Lifau.

Governu kontinua tau matan ba inan isin rua no labarik sira, fó prioridade tebes ba ida-ne’e, tanba Timor-Leste, sai aat liu iha ASEAN no sai terseiru lugár iha mundu tanba sofre má-nutrisaun króniku, afeta ba raes badak ba labarik sira.

Tuir Vise Primeiru-Ministru katak, labarik mak futuru nasaun nian, maibé sofre má-nutrisaun impaktu mós ba iha kakutak, afeta labarik baruk ba eskola, iha eskola dukur, baruk atu estuda.

“Entaun da-ne’e perigu ba labarik nia futuru atu kontinua nasaun ne’e, sei ho kondisaun mentál, fíziku no kondisaun kakutak hanesan ne’e mak ita labele halo kompetitivu ho nasaun seluk, entaun ita tenke hadi’a agora,” nia katak.

Notísia relevante: UNMICS koordena ho RAEOA ba implementasaun Programa Alimentasaun Integrada

Diretór Ezekutivu Serbisu Unidade Misaun Kombate Stunting ka Raes Badak, (UNMICS), Joel Maria Pereira,  informa, programa integradu ne’e koordena hamutuk ho Ministériu Saúde, Ministériu Agrikultura, parseiri dezenvolvimentu sira, tantu husi ajénsia ONU no no ONG nasionál no internasionál.

“Programa ne’e tenta hodi integra armoniza aprosimasaun hotu ligadu ho esforsu hodi hatún taxa má-nutrisaun ka sub-mitigasaun iha rai laran,” nia dehan.

Nia informa, bazea aprosimasaun sub-mitigasaun jeralmente iha rua, intervensaun espesífiku mak hala’o direita husi Ministériu Saúde no intervensaun sensitivu ne’ebé hala’o husi ministériu relevante sira seluk.

Intervensaun sira-ne’e presiza hetan apoia husi ministériu sira, no apoia mós husi entidade hotu oinsá bele eduka inan-aman ho família sira, atu tau matan didi’ak ba oan sira.

Tanba ne’e mak ministériu relevante sira hamutuk ho UNMICS, tenta define padraun operasaun ida atu haree bele halo intervensaun direta no indireita ba iha área ne’ebé define ona.

Nia dehan, programa ne’e hanesan kontinuasaun, ne’ebé antes ne’e hala’o ona intervensaun iha munisipíu Dili, Ermera, no Maliana agora UNMICS hamutuk ho parsériu sira tenta extende liután intervensaun ne’e mai RAEOA.

“Iha RAEOA rasik, ita hili ona fatin haat, primeiru iha suku Lifau, Costa no suku Naimeko. Iha sub-rejiaun Oésilo, suku Bobometo no Usitasa’e,  ho totál benefisiáriu hamutuk 397 inklui inan isin rua no labarik sira,” nia informa.

Alende ne’e, iha rai boot hala’o intervensaun hanesan ho totál benefisiáriu hamutuk 400-resin, mak iha etapa dahuluk ne’e, tuir mai sei apoia asisténsia direita ba iha benefisiáriu sira hamutuk 857 direita, la inklui mós apoia indireita sira hanesan fasilita formasaun apoia halo toos ai-hun, ne’ebé responsabiliza husi Ministériu Agrikultura liuhusi diresaun nasionál extensionista ho parsériu sira.

Notísia relevante: Sekretáriu Rejionál Saúde Oé-Cusse otimista rezolve kazu má-nutrisaun

Iha biban ne’e, Sekretáriu Rejionál ba Asuntu Saúde, Luís de Jesus Neno, reprezenta Prezidente Autoridade RAEOA, hateten, kazu má-nutrisaun iha 2023 Oé-Cusse okupa fatin datoluk, tuir dadús 2024 rejista labarik isin krekas 270.

Nia hatutan, husi númeru ne’e mai husu suku lima, iha sub-rejiaun Pante Makasar  dahuluk iha suku Lifau akontese iha aldeia Nefobai, suku Costa akontese iha postu saúde Quniat no suku Naimeko akontese iha postu saúde Oélulan.

Nune’e mós iha sub-rejiaun Oésilo iha suku Bobometo akontese iha aldeia Usapikolen, Hoineno no aldeia Oénoah no iha Usitasa’e akontese iha aldeia Pune, maibé husi suku lima ne’e, labarik sira ho kazu isin krekas aas liu iha suku Lifau.

Nia esplika, kauza má-nutrisaun akontese iha Oé-Cusse iha fatór haat, primeiru labarik sira hetan abandonadu husi inan-aman, tanba inan-aman okupadu liu ho serbisu natar no to’os la tau atensaun ba labarik sira-nia hahán no hemu.

Fatór daruak, labarik ho inan, konsumu bee-moos ladún iha kualidade di’ak, fatór datoluk ambiénte ka sanitasaun komunitária seidauk di’ak tuir padraun saúde mundiál nian, fatór ikusliu maka iijiéne personalidade

“Tan ne’e problema sira-ne’e responsável ita hotu nian, oinsá bele buka solusaun ida di’ak, atubele rezolve problema sira-ne’e,” nia konklui.

Notísia relevante:Implementasaun ZEESM kontribui ba mudansa liña pobreza iha RAEOA

Entretantu, bazea dadús survey husi Timor-Leste Food and Nutrition Suvey (TLFNS, sigla inglés) iha 2020, Timor-Leste enfrenta kazu Stunting ne’e 47% no aas ona iha nivél rejionál no RAEOA okupa fatin datoluk iha Timor-Leste atinje 57% depois Ermera 63% no Ainaro.

Purtantu, bazea livru 3C RAEOA-ZEESM nian iha 2021, prevista dadus Peskija Timor Leste Living Standard Survey iha 2014 hatudu katak, indise liña ki’ak iha Oé-Cusse atinje 62.2% hatudu katak fó atensaun maka’as ba planeamentu dezenvolvimentu rejiaun ekonomia komunidade.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!