iklan

COVALIMA, HEADLINE

CCLN klarifika kona-ba orsamentu ba apoiu sosiál ba veteranu mate

CCLN klarifika kona-ba orsamentu ba apoiu sosiál ba veteranu mate

Prezidente CCLN,m Vidal de Jesus 'Reak Leman', enkontru ho estrutura Konselu Veteranu Covalima.

COVALIMA, 28 Maiu (TATOLI) – Prezidente Konsellu Kombatente Libertasaun Nasionál (CCLN, sigla portugés), Vidal de Jesus ‘Reak Leman’, konvoka diálogu ho Konsellu Veteranu Covalima hodi klarifika katak CCLN la prevee verba ruma ba apoia veteranu mate, maibé aloka de’it orsamentu atu fasilita estrutura konsellu veteranu hodi partisipa serimónia fúnebre.

“Ha’u mai atu rezolve problema relasiona ho publikasaun notísia kona-ba apoiu osan no sosa lilin bainhira estrutura konsellu veteranu hetan konvite atu lori bá asiste prosesu fúnebre ba veteranu mate”, Reak Leman dehan iha edífisiu Konsellu Veteranu Covalima, iha Tabakolot, ohin.

Nia salienta katak ho mídia nia publikasaun notísia bele fó oportunidade hodi halo vizita bá iha Konsellu Veteranu Covalima hodi halo esplikasaun loloos kona-ba orsamentu hodi fasilita estrutura sira bainhira hetan konvite atu partisipa prosesu fúnebre.

“CCLN la prevee orsamentu atu halo konstribuisaun ba veteranu sira mate, maibé aloka orsamentu kada munisípiu rihun $6 atu apoia konsellu veteranu bainhira hetan konvite bá asiste prosesu fúnebre veteranu mate hodi sosa lilin no osan la define montante, depende halo de’it jestaun”, Reak Leman esplika.

Aleinde klarifika kona-ba orsamentu ne’e, Prezidente CCLN halo mós monitorizasaun ba relatóriu sobre utilizasaun verba ba Loron Nasionál Veteranu, fundu ne’ebé mai husi Servisu Auditoria Apoiu Sosiedade Sivíl (SASCAS) nian.

Lembra katak, iha 2023, SASCAS  apoiu  orsamentu ba CCLN hamutuk rihun $38, husi montante ne’e, rihun $10 apoia ba edukasaun ba família veteranu grau 4 a 7 ho totál estudante na’in-20, osan rihun $20 atu tulun ba veteranu sira haki’ak karau ho manu no rihun $8 apoia ba administrasaun.

Koordenadora grupu 12 de Outubru Foho Tetuk, Pasquelia Marcelina dos Reis Amaral, esplika katak utilizasaun fundu ne’ebé mai husi SASCAS apoiu ba edukasaun ba família veteranu grau 0 a 3 no hakbiit ekonomia veteranu grau 4 a 7.

“Ami grupu 12 Outubru Foho Tetuk hanesan implementadór fundu apoiu insentivu edukasaun ba estudante na’in-20 no fundu hakbiit ekonomia nian rezultadu mak grupu haki’ak ona karau hamutuk 15 iha postu administrativu Maucatar no loke kooperativa fatin halibur fini iha postu Zumalai”, informa.

Rekorde katak membru Konsellu Veteranu munisípiu Covalima, Domingos Oliveira ‘Foti Riba’, husu, foin lalais ne’e, ba Ministériu Asuntu ba Kombatente Libertasaun Nasionál (MAKLN) atu halo auditoria ba utilizasaun orsamentu liga ba apoiu sosiál ba veteranu sira, liuliu bainhira mate.

Foti Riba esplika katak, kuandu kombatente ida mate, ministériu apoia kaixaun ho bandeira RDTL no osan $300 no seluk tan. “Maibé, iha realidade membru balun entrega de’it osan $40 no lilin kaixa ida bainhira veteranu mate”, nia lamenta.

Ho atu ida ne’e mak nia solisita atu halo auditoria hodi hatene utilizasaun orsamentu ho loloos, tanba situasaun ida ne’e hafo’er Ministériu Asuntu Kombatente Libertasaun Nasionál no veteranu nia naran.

Notísia relevante: MAKLN presiza halo auditoria ba utilizasaun orsamentu apoiu sosiál ba veteranu mate

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!