DILI, 28 maiu 2024 (TATOLI)—Ekipa husi Ministériu Obra Públiku (MOP) akompaña husi munisípiu Dili, tersa ne’e, hahú sukat restaurante Cossete – Tea & Bistro metru rua husi dalan ba edifísiu laran, ne’ebé kona morru hun to’o varanda inklui ninia naruk metru 21.
Ekipa halo atividade ne’e tanba konsidera parte oin edifísiu restaurante okupa espasu públiku, ne’ebé loloos hanesan fatin ba valeta no pedestre.
Iha biban ne’e, Na’in ba restaurante Cossete, Eufrasia Vieira, hateten, nu’udar sidadaun nia prontu koopera maibé Governu mós tenke konsidera na’in ba rai tanba rai ne’ebé Governu konsidera okupa espasu públiku ne’e hanesan rai privadu.
“Ha’u koopera no uluk kedas ami hein hakarak mai sukat atu ita hatene ami-nian mak ne’ebé no uza ba espasu públiku nian mak ne’ebé, maibé laiha, mai fó de’it notifikasaun ko’alia kasar hakarak sobu de’it, nu’udar sidadaun prontu koopera maibé tenke tuir regra. Uma ne’e ha’u hola laiha valeta no valeta sira ne’ebé iha privadu rasik mak halo kontribui ba Estadu, maibé ami lahalo uma iha valeta ka trotoar leten, agora Governu hakarak mai dehan sobu ami koopera maibé tenke selu tanba rai privadu,” Eufrasia Vieira, informa ba Jornalista sira, iha resintu restaurante Cosette, Pantai Kelapa.
Notísia relevante : Munisípiu Dili notifika ona na’in ba restaurante Cosette hodi hamamuk fatin
Nia dehan, loloos molok munisípiu Dili mai fó notifikasaun, ekipa tenke mai sukat uluk lai maibé realidade ekipa fó uluk notifikasaun no ohin foin mai sukat, nune’e nia konsidera la tuir regra.
“Notifikasaun ne’ebé fó ami ne’e kontra tiha ona lei 32 artigu 42 no 43, sira kontra tiha ona tanba antes atu foti desizaun tenke prova uluk lai, ita hotu hatene dekretu-lei númeru 33/2008 kona-ba ijene no orden públiku ne’e atu hasai ema ne’ebé okupa rai públiku la’ós privadu, maibé ba privadu tenke haree rai ne’e no ko’alia ho na’in hodi multa,” nia tenik.
Eufrasia Vieira haktuir, uma no rai ne’ebé harii restaurante Cosette ne’e hola iha tinan 2021, no restaurante foin loke ba públiku iha fulan-haat liubá no daudaun fó serbisu ba timor-oan hamutuk 27, ho saláriu mensál hahú $150 ba leten.
Antes ne’e, iha loron 21 maiu 2024, munisípiu Dili lori karta notifikasaun ba restaurante Cosette nia na’in hodi hamamuk fatin iha loron-neen nia laran, hahú loron fó sai notifikasaun.
Jornalista : Arminda Fonseca
Editora : Julia Chatarina
