VIQUEQUE, 28 maiu 2024 (TATOLI)- Xefe Sentru Saúde Postu Administrativu Lacluta, munisípiu Viqueque, Bendito Soares, informa, estoke ai-moruk iha sentru saúde Lacluta,Munisipiu Viqueuqe, daudaun sufisente hodi fó atendementu ba pasiente, nune’e nia-rejeita informasaun ne’ebé espalla iha rede sosiál katak estoke ai-moruk laiha.
“Kona-ba estoke ai-moruk báziku ne’ebé iha sentru saúde Lacluta daudaun sufisiente hodi fó atendimentu diáriu ba abitante sira-ne’ebé moras. Nune’e ami seidauk kestiona hodi dehan estoke ai-moruk hotu”, Bendito Soares, hateten ba Agência Tatoli, iha kna’ar fatin, ohin.
Xefe Sentru Saúde ne’e afirma, ai-moruk sira-ne’ebé stock out iha nasionál ne’e situasaun territóriu nian, maibé iha sentru Saúde Lacluta estoke sufesiente no durante ne’e pesoal saúde sira halo hela atendementu ba pasiente sira hanesan baibain.
“Ohin, tersa ne’e (28/05) to’o oras ne’e ami sei halo atendimentu ba moras sira no fahe ai-moruk ba ita-nia pasiénte sira. Ami agora iha hela sentru laiha abitante ida mak mai kestiona dehan ai-moruk estoke out. Tanba ne’e ami hakarak informa ba públiku tomak katak ami-nia estoke ai-moruk daudaun sufisiente”, nia afirma.
Sentru Saúde Lacluta estoke ai-moruk hamutuk 192, husi númeru ne’e item haat maka stock out hanesan amoxicillin, metronidazole, ibuprofen no multi vitamin tablet, maibé ladun iha impaktu ba atendimentu tanba iha ai-moruk seluk ne’ebé bele subtitui.
“Ami iha pedidu regulár hanesan estoke menus ami haruka pedidu ba munisípiu hodi responde ai-moruk ba ami. Alende pedidu ami mós iha sistema and supplier ne’ebé bele halo kontaktu ba ai-moruk sira-ne’ebé iha sentru saúde. Nune’e mós kada fulan ami sempre aprezenta pedidu ba nasionál”, nia afirma.
Notisia relevante: Ai-moruk “stock out”: Governu aloka millaun $8 ba INFPM atu sosa ai-moruk
Jornalista : Vitorino Lopes da Costa
Editór : Florencio Miranda Ximenes
