DILI, 22 maiu 2024 (TATOLI)–Diretór Ezekutivu Institutu Nasionál Farmasia no Produtu Medikamentu (INFPM), Brígido Simão Dias de Deus, hateten Ministériu Saúde aloka tan ona millaun $8 hodi bele halo akizisaun ai-moruk ba INFPM.
Nia hateten, INFPM bele halo ona ajustamentu ba sira-nia planu hodi halo akizisaun ba medikamentu sira hodi bele fornese ba ospitál, sentru saúde no postu saúde sira. Ho orsamentu sira-ne’e bele responde ona ba akizisaun ai-moruk ba armazenamentu INFPM nian ba tinan ida-ne’e.
“Governu aumenta ona orsamentu ba ita atu bele halo kompra ba ai-moruk hodi bele taka to’o tinan ida-ne’e nia rohan. Ida-ne’e, ami haree sufisiente. To’o horisehik, mai ami millaun $8, ami bele kobre situasaun atuál to’o tinan ida-ne’e nia rohan,” Diretór Ezekutivu INFPM ne’e hateten ba jornalista sira liuhusi konferénsia imprensa, iha Kampung Alor, kuarta ne’e.
Produtu medikamentu balun agora tama mai ona iha Portu Tibar nian hodi bele aumenta stock ai-moruk iha Hospital Nasionál Guido Valadares (HNGV).
Governu rona prekupasaun na’i-ulun sira no públiku, tanba ne’e mak aumenta ona osan hodi INFPM bele prosesu ba akizisaun ai-moruk.
Diretór Servisu Apoiu Diagnostiku no Terapeutiku iha Ospital Nasionál Guido Valadares (HNGV), Vidal de Jesus Lopes, hateten INFPM iha aimporuk stock out iha INFPM hamutuk 31% ba iha ai-moruk nesesáriu, vital, esensiál no konsumavel.
“Ai-moruk stock out iha INFPM aproximadamente iha 31%, tanba ai-moruk tama mai distribui kedas, tan ne’e pursentu sa’e hela de’it. Iimportante mak stock out iha fasilidade saúde sira labele tun,” Vidal de Jesus Lopes hateten ba jornalista sira liuhosi konferénsia imprensa, iha Kampung Alor.
Ai-moruk stock out iha HNGV mak 16% ne’ebé korresponde ba item 66 mak laiha husi totál item 405.
Iha mós, ai-moruk stock out konsumavel ho porsentu 12% ne’ebé ekivalente item 52 mak laiha hosi total konsumavel item 440.
“Ai-moruk stock out ne’e flutua, depende ba iha fornesimentu empreza sira halo akizisaun ba iha ai-moruk,” nia dehan.
Diretór garante katak Dirasaun Nasionál Farmaseutika no Produtu Medikamentu no INFPM kontinua halo esforsu atu garante ai-moruk stock out.
Jornalista : Jesuína Xavier
Editór : Cancio Ximenes
