MESSK selebra kontratu ho ensinu superiór privadu 17
DILI, 28 maiu 2024 (TATOLI)–Ministériu Ensinu Superiór Siénsia no Kultura (MESSK), tersa ne’e, selebra kontratu ho instituisaun ensinu superiór privadu hamutuk 17.
“Kontratu ne’e hodi Governu atribui subvensaun. Ohin iha ha’u-nia diskursu, ha’u hateten ba sira, osan ne’e povu nian, tenke iha responsabilidade atu ezekuta ho didi’ak. Ita transfere uluk 40%, ministériu iha obrigasaun no ekipa téknika sira sei ba vizita ensinu superiór sira ne’e atu haree sira-nia prosesu ho subvensaun,” Ministru Ensinu Superiór, Siénsia no Kultura, José Honório da Costa Pereira Jerónimo, informa hafoin asina kontratu, iha salaun MESSK, Colmera.
Ministériu atribui subvensaun ba kada instituisaun ensinu superiór entre $200.000 to’o $300.000, depende ba avaliasaun akreditasaun akadémika.
Enkuantu, verba ne’ebé prevee iha Orsamentu Jerál Estadu (OJE) 2024 hamutuk millaun $5 la atribui ba ensinu superiór públiku tanba kada tinan Governu iha alokasaun ona. Atribuisaun kiik liu (menus husi $200.000) ba Institutu Naroman Esperansa no Universidade Katólika Timorense (UCT, sigla portugés) João Paulo II, tanba foin mak iha lisensa no seidauk iha avaliasaun.
“Karik ninia ezekusaun la tuir akordu ne’ebé ohin halo, sansaun klaru, depende ba sira-nia relatóriu, fó uluk 40% hodi ita bele haree, depois fó tan 60%. Sansaun ne’e mak relasiona ho sira-nia kursu sira, tanba ne’e iha pontu ualu iha selebrasaun kontratu ne’e sira bele ezekuta osan ne’e ho di’ak,” nia akresenta.
Notísia relevante : MAKLN prevee millaun $1,1 hodi fó bolsa estudu ba veteranu nia oan
Nune’e mós, Diretór Jerál Finansa no Planeamentu iha MESSK, Hernani da Costa Soares, informa, bazeia ba akordu ne’e, kontratu ne’e válidu to’o loron 31 dezembru 2024, tanba orsamentu kaduka anualmente.
Benefisiáriu subvensaun sira tenke aprezenta relatóriu ba MESSK tarde liu iha loron 10 janeiru 2025 no tenke aprezenta relatóriu ba Ministériu Finansa (MF) tarde liu iha loron 15 janeiru.
“Ami simu relatóriu de’it, la simu osan, ein termu cash iha ministériu nia liman. Ami presiza dokumentu tenke maihusi ita-boot sira, manuál ezekusaun husi ita-boot sira, tanba ita la uza regra Governu nian hodi lori halo ezekusaun. Ami presiza manuál ezekusaun no manuál aprovizionamentu liuhusi pagamentu ne’e para ami iha akompañamentu di’ak liu no sira-nia prosesu ezekusaun. Kuandu hatama tiha relatóriu, ami transfere uluk 40%, ne’ebé asina kontratu hotu ami verifika dokumentu. Orsamentu ne’ebé ita iha ba kada instituisaun ami fo fleksibilidade atu halo,” nia tenik.
Reitór UNDIL, José Agostinho Belo, dehan, orsamentu natoon ne’e bele ajuda ona timoroan hotu, liu-liu instituisaun sira atubele hasa’e kualidade tanba bainhira aposta ba kualidade presiza iha kooperasaun di’ak.
“Asina akordu ida-ne’e importante ba ami hotu tanba ami iha kompromisu. Ami ho kolega sira balun iha ona esperiénsia maibé balun seidauk, ami sei serbisu hamutuk oinsá atu iha responsabilidade hodi ezekuta osan ne’e ho di’ak liután,” nia salienta.
Jornalista : Osória Marques
Editora : Julia Chatarina
