HEADLINE, POLÍTIKA

PR simu karta kredensiál husi Embaixadór Argentina, Chile no Ghana

PR simu karta kredensiál husi Embaixadór Argentina, Chile no Ghana

Prezidente Repúblika, Jose Ramos-Horta. Imajen Tatoli/Egas Cristóvão

DILI, 28 maiu 2024 (TATOLI) – Prezidente Repúblika, José Ramos Horta, tersa ne’e,  iha Palásiu Prezidensiál Bairru-Pité-Dili, simu karta kredensiál husi Embaixadór foun sira ne’ebé foin nomeadu husi Repúblika Argentina, Repúblika Chile no Repúblika Ghana.

Karta kredensiál  mak hanesan husi Gustavo Ricardo Coppa, nu’udar Embaixadór foun Estraordináriu no Plenipotensiáriu Repúblika Argentina ba Repúblika Demokratika Timor-Leste, rezidente iha Jakarta, Indonézia.

Mario Ignacio Artaza Loyola aprezenta nia karta kredénsial nu’udar Embaixadór foun Estraordináriu no Plenipotensiáriu Repúblika Xile ba Repúblika Demokratika Timor-Leste, ne’ebé mós rezidente iha Jakarta.

Alende ne’e, Florence Buerki Akonor aprezenta nia karta kredénsial nu’udar Embaixadora foun Estraordinária no Plenipotensiáriu Repúblika Ghana nian ba Repúblika Demokratika Timor-Leste, rezidente iha Kuala Lumpur, Malázia.

“Prezidente Ramos Horta simu Embaixadór foun sira no reforsa kompromisu Timor-Leste nian atu hametin relasaun amizade no kooperasaun bilaterál ho Argentina, Xile no Ghana hodi fó benefísiu mútua ba povu tomak,” tenik iha nota ne’ebé Agência TATOLI asesu husi media Prezidente Repúblika.

Durante hasoru malu Prezidente ko’alia liu kona-ba relasaun Timor-Leste nian ne’ebé naruk ho Argentina ne’ebé mai husi estabelesimentu relasaun diplomátika iha 2002. Nia simu kooperasaun ne’ebé kontinua, inklui liu husi akordu kooperasaun téknika 2013 ne’ebé fasilita interkámbiu no projetu konjunta sira.

Ho Chile, Prezidente Repúblika nota relasaun istórika nasaun rua durante luta ba independénsia Timor-Leste nian. Prezidente hato’o nia apresiasaun ba apoiu husi Xile ba kandidatura Timor-Leste nian iha Nasoins Unidas no hein katak relasaun ho Embaixadór foun ne’e sei di’ak liután.

Relativamente ho Ghana, Prezidente Ramos-Horta hatutan fali Timor-Leste nia hakarak atu hametin relasaun amizade ne’ebé hahú iha 2002. Prezidente enkoraja Ghana atu estabelese rezidénsia misaun diplomátika ida iha Dili hodi fasilita kooperasaun ne’ebé besik liu, inklui liuhusi forum multilaterál hanesan g7+ no CPLP.

Prezidente Repúblika kongratula Embaixadór foun na’in tolu no hein atu servisu hamutuk ho sira hodi promove ajenda bilaterál sira, reforsa ligasaun amizade nian no esplora parseria ne’ebé benefisia malu iha setór oin-oin iha tinan hirak oin mai.

Notísia relevante:Xefe Estadu simu karta kredensiál husi Embaixadór Angola

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!