DILI, 27 maiu 2024 (TATOLI)— Ministériu Saúde (MS) liuhosi Servisu Nasionál Apoiu Emerjénsia Médika (SNAEM) planeia, tinan ne’e, sosa ambulánsia hodi distribui ba fasilidade saúde sira, iha munisípiu, inklui Dili.
“Tuir planu estratéjiku tinan 2023-2027, kada tinan, tenke sosa ambulánsia hodi distribui ba iha fasilidade Saúde sira,” Diretór nasionál apoiu emerjénsia médika, Simplicio Amaral, informa, iha salaun Larigutu CNE Cailoli, ohin.
Maibé, tuir Diretór Simplicio, iha tinan ne’e ambulánsia lima ne’e sosa, primeiru, atu atende ba vizita Amu Papa nian mai ita-nia rain iha fulan setembru ne’e, depois Amu Papa fila fali ba Vatikanu, mak sei distribui ba iha Munisípiu Liquiça, Viqueque, Ermera, Covalima no Dili.
“Ita sei distribui ba munisípiu sira ne’ebé mak problema ho ambulánsia, entaun ita tau ne’ebá nune’e sira utiliza halo transferénsia moras ba ospitál sira nune’e bele hetan atendimentu adekuadu husi profisionál sira,” nia afirma.
Ezekutivu ne’e informa, ambulánsia ne’e sei sosa iha Tailándia ho orsamentu ne’ebé Governu liuhusi MS aloka ba SNAEM.
“Osan ne’ebé ita atu sosa ambulánsia mak Ministériu Saúde aloka mai iha SNAEM, I.P hamutuk $320 mil,” nia konklui.
Entretantu, Orsamentu Jerál Estadu (OJE) 2024 aloka ba MS hamutuk USD 67.600.906. No, OJE ba SNAEM, I.P rasik ho montante USD 2473.928. Husi totál verba alokada ba SNAEM ne’e hodi implementa programa sira hanesan funsionamentu no dezenvolvimentu institusionál no mós kuidadu saúde sekundáriu no tersiáriu, ho kategória Saláriu no Vensimentu (1.129.037 USD), Bens servisu no Korrente (894.891 USD), Transferénsia públika (125.000 USD), Kapitál Menór (325.000 USD) no Kapitál dezenvolvimentu (la iha).
SNAEM estabelese ona iha tinan-2021, bazeia ba Dekretu Lei No. 25/ 2020, 10 Junho. SNAEM, I.P designa hanesan servisu personalizadu intergradu iha administrasaun indireta Estadu, ho kapasidade judisiariu hanesan institutu publiku, no dotado Autonomia Administrativa, Finanseiru no patrimoniu própriu.
SNAEM, iha área Juridisiáriu iha territóriu nasionál tomak. Sede SNAEM aloka iha Dili, estabelese mós servisu deskonsentradu iha administrativa munisípiu no mós iha Rejiaun Administrativa Oe-cusse Ambeno.
Iha ámbitu atribusaun ba SNAEM mak hala’o koordenasaun iha Sistema Intergradu Emerjénsia Médika inklui atividade hotu Urjensia i/ou Emerjénsia liuhusi servisu Kuidadu/ primeiru sokorru pre-Ospitalar transporte, resesaun ospitalar no referénsia pasiente urjénsia i/ou emerjénsia responsavel ho adekuadu, formasaun emerjénsia médika, Pleaneamentu sívil ba iha Prevensaun no mós Telekomunikasaun.
Notísia relevanteGovernu entrega karreta ambulánsia haat ba servisu saúde Manatuto
Jornalista : Felicidade Ximenes
Editór: Rafael Ximenes de A. Belo
