iklan

HEADLINE, POLÍTIKA

Xefe Estadu kondekora Embaixadór Brazíl ho medalla ordem onorífiku

Xefe Estadu kondekora Embaixadór Brazíl ho medalla ordem onorífiku

Prezidente Repúblika, Jose Ramos-Horta kondekora ho órdem Timor-Leste ba Embaixadór Brazil iha Timor-Leste, Mauricio Medeiros de Assis. iha Palásiu Prezidensiál, Bairru-Pité, tersa (28/05). Imajen Tatoli/Egas Cristóvão

DILI, 28 maiu 2024 (TATOLI) –  Prezidente Repúblika (PR), José Ramos Horta, kondekora Orden onorífiku Timor-Leste ba Embaixadór Repúblika Federál Brazil iha Timor-Leste, Maurício Medeiros de Assis, ne’ebé termina ona nia misaun servisu iha nasaun ne’e.

Kondekorasaun ne’ebé Xefe Estadu atribui ba Embaxadór ne’e hodi rekoñese ninia dedikasaun ezemplár no susesu boot durante nia misaun diplomátika tinan tolu iha Timor-Leste.

“Embaixadór Maurício nu’udar Timor-Leste nia belun ne’ebé loos, hodi hala’o papél fundamentál ida hodi promove ita-nia nasaun nia interese no promove amizade entre ita-nia povu sira,” Prezidente Horta katak iha nia diskursu ne’ebé hala’o iha Palásiu Prezidensiál Bairru-Pite Dili, tersa ne’e.

Prezidente Repúblika, Jose Ramos-Hort,  kondekora ho órdem Timor-Leste ba Embaixadór Brazil iha Timor-Leste, Mauricio Medeiros de Assis. iha Palásiu Prezidensiál, Bairru-Pité, tersa (28/05). Imajen Tatoli/Egas Cristóvão

Tuir Horta, Embaixadór ne’e durante hala’o misaun iha Timor-Leste hatudu nia profisionalizmu, dedikasaun no haka’as an atu haburas nasaun rua nia relasaun bilaterál, nune’e merese hetan onra boot husi Estadu.

Relasaun diplomátika entre Timor-Leste no Brazíl estabelese iha loron 20 Maiu 2002 hafoin Timor-Leste restaura nia-independénsia.

Timor-Leste kontinua fó apoiu ba kandidatura Brazíl nian iha organizasaun oioin ONU no internasionál durante tinan barak.

“Lori povu Timor-Leste nia naran hato’o agradese ba Brazíl ne’ebé durante ne’e fó apoia másimu tebes ba ita nia dezenvolvimentu iha setór oioin,” Horta katak.

Apoia Embaxada Brazíl ba Timor-Leste

Rekorda fali katak, Embaixadór Assis iha ona karreira tinan 25 iha Servisu Estranjeiru Brazíl nian, ne’ebé servisu iha papél oioin iha sede Ministériu nian iha Brazilia no mós iha misaun diplomátika Brazíl nian sira iha Madrid, Sydney, Hanoi no Shanghai, molok hala’o nia kna’ar nu’udar Embaixadór mai Timor-Leste iha Dezembru 2020.

Iha nia lideransa, Brazil fó ona apoiu ne’ebé boot ba Timor-Leste liu husi akordu kooperasaun hamutuk 23 ne’ebé eziste ona mak hanesan edukasaun, administrasaun públika, justisa, defeza, seguransa, formasaun profisionál, saúde no seluk tan. Liu-liu, Embaixadór Assis fasilita estabelesimentu projetu kooperasaun bilaterál foun ho instituisaun Timoroan sira no hadi’a fali inisiativa sira iha pasadu.

Iha tinan 2023, Brazíl no Timor-Leste asina ona ajusta komplementar ba Akordu Kooperasaun 2002 nian iha Edukasaun kona-ba kriasaun Programa Mestradu iha Edukasaun Universidade Nasionál Timor-Lorosa’e (UNTL) nian.

Alende ne’e, Embaixadór Assis organiza projetu pilotu ida ho objetivu atu fó formasaun ba profesór sira husi eskola públiku téknika no vokasionál sira iha Dili no Munisípiu sira.

Embaixadór ne’e mós sai nu’udar apoiante ida-ne’ebé forte ba “Operasaun Maubere”, programa formasaun militár ida-ne’ebé fornese husi Forsa Armada Brazíl ba Polísia Militár (PM) Falintil-Forsa Defeza Timor-Leste (F-FDTL) nian.

Nia mós ajuda reforsa kooperasaun téknika ho Parlamentu Nasional Timor-Leste, lakleur tan Brazíl sei fila fali hodi fó kbiit ba SENAI Profisionál no Sentru Vokasionál Becora nian no fornese asisténsia téknika ba agrikultór sira eskala ki’ik iha Agrokolojia.

Notisia relevante: Embaixadór Brazíl agradese Estadu TL ne’ebé apoia donativu millaun $4

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!