DILI, 29 maiu 2024 (TATOLI) – Ekipa istimadu husi Munisípiu Viqueque Aimou FC susesu manán adversáriu husi Munisípiu Lautem Laivai FC ho golu mihis 1-0, iha jogu kontinuasaun faze grupu kopa Maun Boot Kay Rala Xanana Gusmão ne’ebé realiza iha Estádiu Munisipál Dili, kuarta loraik ne’e.
Bainhira jogu la’o ekipa rua lansa kedan kontra no atake ba malu tuir tékniku no abilidade ekipa idaidak nian nune’e se mak forsa liu nia mak hatama uluk golu fó vitoria ba nia ekipa.
Laivai lansa atake ne’ebé maka’as hasoru Aimou, maibé atake hirak ne’e hela de’it hanesan atake tanba jogadór Aimou mós la fó fatin ba Laivai atu halo golu tuir sira nia vontade. Ho nune’e jogu la’o ho velosidade aas liutan.
Avansadu Aimou lansa atake ne’ebé maka’as maibé sempre salva husi defeza Laivai nian, sutu barak mós Aimou halo maibé barak la kona iha alvu balun mós salva husi guarda rede Laivai.
Ho kualidade jogu ne’ebé hanesan to’o minutu primeira parte nian termina laiha ekipa ida mak prodús golu nune’e ekipa rua provijoriu hela ho empata 0-0.
Hakat ba segunda parte ekipa rua nafatin lansa kontra no atake ba malu tuir tékniku futeból nian, maibé Aimou hatudu jogu ne’ebé bonitu iha minutu 52 jogadór Mario Quefi (21) lansa ona golu hodi muda rezultadu ba 1-0.
Golu ne’e halo Laivai esforsu maka’as liutan nune’e bele halo empata jogu ne’e, maibé esforsu ne’ebé Laivai halo, Aimou sempre hamate tutuir nune’e falla atu halo golu.
Jou la’o másimu liutan maibé ekipa rua halo blokea maka’as ba malu iha lina defeza nian nune’e laiha tan ekipa ida mak hatama tan golu to’o minutu jogu termina vitoria hela ba Aimou no Laivai hela ho derrota.
Husi vitoria Aimou nian lori ekipa ne’e rekolla pontu neen hodi okupa iha pozisaun segundu grupu E, pozisaun primeiru okupa husi UEP FC ho pontu neen, pozisaun terseiru Laivai FC ho pontu tolu no ikus liu Vila Vista FC ho pontu zero.
Notísia relevante: Fitun Ramelau konkista vitória dala uluk iha Kopa Xanana
Jornalista: Hortencio Sanchez
Editór: Florencio Miranda Ximenes
