iklan

DESPORTU

Fitun Ramelau konkista vitória dala uluk iha Kopa Xanana

Fitun Ramelau konkista vitória dala uluk iha Kopa Xanana

DILI, 03 maiu 2024 (TATOLI) – Ekipa futeból ho naran estimadu Fitun Ramelau Letefoho husi Munisípiu Ermera “nabilan” duni iha Estádiu Munisipál Dili tan ho nia kbiit tomak – estratéjia, téknika no tatika, hetan susesu iha nia jornada primeiru hodi rekolla vitória kontra adversáriu Naimeco FC husi Rejiaun Administrativa Oé-Cusse Ambeno (RAEOA) ho eskoru 2-0.

Bainhira minutu jogu hahú, ekipa rua lansa kedan kontra no atake ba malu tuir tékniku no abilidade ne’ebé iha nune’e fó vitória ba sira-nia ekipa.

Durante jogu la’o iha kampu be nahe ho du’ut kór modok nia leten iha Estádiu Munisipál Dili, sesta lorokraik ne’e, ekipa rua hatudu forsa ba malu ho kapasidade tomak hodi anima adeptu sira ne’ebé okupa metin iha tribun leten, hodi asiste no hein rezultadu jogu.

Armada Ramelau hatudu forsa no kbiit ne’ebé signifikativu halo adversáriu Naimeco book-aan la di’ak iha kampu-laran, nune’e iha minutu 19 sorte aat mosu ba Naimeco tanba simu ona golu ida husi Fitun Ramelau liuhusi jogadór Rui Soares (22) bainhira bola barullu iha rede Naimeco nia oin, jogadór ne’e utiliza kedan oportunidade hodi lansa golu, muda eskoru ba 1-0.

Husi golu ne’e fó presaun tebes ba ekipa Naimeco tenke serbisu maka’as liután iha kampu-laran nune’e bele halo empata jogu ne’e. Ka, muda rezultadu, iha tempu no biban ne’ebé mak sei iha, iha lorokraik ne’e

Maibé esforsu ne’ebé jogadór Naimeco halo hela de’it hanesan esforsu “mamuk” tanba la rezulta golu ruma hodi halo empata jogu ne’e. Avansadu Naimeco lansa sutu barak ba rede Fitun Ramelau maibé sutu hirak ne’e barak mak guarda-rede salva no barak mós la kona iha alvu.

Fitun Ramelau kontinua hatudu jogu ne’ebé bonitu la ansi halo golu maske hetan oportunidade bola livre barak. Tanba halo uluk ona golu, Fitun tenta halo jogu ho modelu defensivu no Naimeco halo jogu ofensivu maibé esforsu hirak ne’e kontinua hela de’it naran.

Minutu ba minutu, jogadór ekipa rua kontinua fó ameasa ba malu maka’as, ho bee turuk habokon isin-lolos tan kosar – rezultadu esforsu no serbisu hodi prodús golu, maibé la sai sasukat ba ekipa adversáriu rua hodi hamate sira-nia vontade no espiritu fair play, kontinua hatudu jogu bonitu.

Bola pasa ba mai husi ain ida ba ain seluk. Haksoit husi parte ida ba parte seluk husi jogadór ekipa rua, la to’o minutu 34, sorte di’ak monu tan ba Fitun Ramelau tanba jogadór estranjeiru Appiah Daniel (3) lees tan rede Naimeco nian hodi muda rezultadu ba 2-0.

Husi golu ne’e termina ona,ekipa rua nia jogu iha parte primeiru no deskansa minutu 15 nune’e kontinua fali iha segunda parte.

Hakat ba segunda parte, ekipa rua nafatin lansa dezafiu ba malu, halo jogu sai moris no ritmu maka’as buka konkista malu ho idaidak nia abilidade jogu, liuliu Naimeco esforsu atu duni tuir eskoru ne’ebé Fitun fó hela ba sira maibé “rainha” oportunidade la aparte ba sira to’o jogu termina.

Nune’e, esforsu hela de’it ho esforsu ba Naimeco no Fitun Ramelau Letefoho, Ermera, mantein pozisaun ho eskoru 2 durante jogu la’o no golu mós la akontese tan ona husi parte rua. Tanba ne’e, tanba oras jogu ne’e mós ramata, árbitru deside hapara jogu; vitoria hela ba Fitun Ramelau no Naimeco obrigadu hela ho derrota hodi hein jogu seluk tuirmai.

Jornalista: Hortencio Sanchez

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!