“Ho Espíritu Juventude 12 Novembru nian, Lori ita Hamutuk ba Harii Pás”
DILI, 05 Novembru 2026 (TATOLI)–Ministériu Juventude, Desportu, Arte no Kultura (MJDAK) sei selebra Loron Nasionál Juventude tinan ne’e iha Munisípiu Manatutu no komemorasaun Masakre Santa Cruz sei hala’o iha Dili.
Notísia Relevante: Militár Sira Lori Karreta “HINO” Sama-Mate Vítima Masakre Santa Cruz
Selebrasaun loron nasionáal juventude ne’e ho tema prinsipál “Ho Espíritu Juventude 12 Novembru nian, Lori ita Hamutuk ba Harii Pás no Autór ba Dezenvolvimentu Sustentável”, no sub-tema “Valoriza Unidade no Sakrifísiu Loriku Aaswa’in 12 Novembru hodi Hametin Istória liuhusi Asaun kriativu hodi Hakat ba Futuru”.
“Selebrasaun rua ne’e iha ligasaun istóriku ne’ebé metin, tanba husi Masakre Santa Cruz mak Estadu rekoñese 12 Novembru hanesan Loron Nasionál ba Juventude sira,” Diretór Jerál Juventude MJDAK, Mário Tilman, hateten ba jornalista sira iha edifisiu MJDAK Dili, ohin.
Tuir nia, MJDAK deside lori selebrasaun nasionál ba munisípiu sira tanba loron ne’e pertense ba juventude hotu-hotu iha Timor laran tomak no la’os de’it ba foinsa’e sira-ne’ebé hela iha kapitál.
“Tinan kotuk ita hahú selebra iha Aileu no tinan ne’e ita sei hala’o iha Manatutu,” nia dehan.
Preparasaun ba eventu ne’e, tuir nia, to’o ona faze finál no abertura ofisiál sei hala’o iha Sábadu, 07 Novembru.
Nia dehan, MJDAK nia alvu ba juventude hamutuk na’in-420 mak sei partisipa selebrasaun loron nasionál juventude, ne’ebé reperzentante juventdue hirak ne’e mai husi postu administrativu hitu iha Munisípiu Manatutu.
Diretór Jerál ne’e esplika, komemorasaun tinan ne’e fahe ba parte tolu mak loron Nasionál Juventude iha Manatutu, Masakre Santa Cruz iha Dili, no atividade iha postu administrativu sira ne’ebé sei agrupa atividade rua ne’e.
Atividade iha Manatutu sei hahú ho abertura ofisiál, espozisaun artezenatu, doasaun raan no kalan kulturál iha loron 07 Novembru.
Iha loron 08 Novembru, sei iha marsa saudavel, kompetisaun marsa unidu, kompetisaun poezia no atividade seluk tan.
Iha loron 09 Novembru, sei kontinua ho kompetisaun sira no iha loron 10 Novembru sei hala’o semináriu nasionál, grande finál kompetisaun, painel diskusaun, kalan reflesaun no aprezentasaun filme dokumentáriu.
Enserramentu ba loron nasionál juventude ne’e sei hala’o iha loron 12 Novembru ho misa agradesimentu, kari ai-funan iha semitériu, distribuisaun prémiu no atividade seluk tan, ho orsamentu hamutuk rihun $100.
Husi totál ne’e, kuaze rihun $30 ba Komemorasaun Masakre Santa Cruz, rihun $20 ba Selebrasaun Loron Nasionál Juventude iha Manatutu no rihun $50 aloka ba kada postu administrativu atu selebra atividade rua ne’e.
Mário Tilman subliña, asaun MJDAK nian ba juventude la’os de’it iha tempu selebrasaun.
“Esforsu barak ita halo ona. MJDAK apoiu hela organizasaun juventude sira oinsá kontinua polítika Governu nian, liuliu instala sentru juventude sira, tanba dadaun sentru sira ne’e fasilita hela formasaun ba juventude sira,” nia hateten.
MJDAK mós apoiu Uniaun Nasionál Eskuteiru hodi hadi’a karáter juventude sira-nian.
Nia husu ba juventude ohin loron nian atu banati tuir ezemplu juventude 12 Novembru nian, ne’ebé iha tempu defísil fó sira-nia an hodi harii nasaun ne’e.
“Juventude sira agora, Estadu prepara kondisaun barak ona, liuliu sentru juventude sira-ne’ebé apoiu husi MJDAK hodi hasa’e sira-nia kapasidade, nune’e husu atu aproveita,” nia dehan.
Notísia Relevante: Levi Bucar: “Ita-Nia Raan Maten Ne’e Dois La Halimar!”
Jornalista : Hortêncio Sanchez
Editór : Cancio Ximenes
