iklan

BAUCAU, HEADLINE

Atividade PNDS Baucau foin tama iha faze kuotasaun

Atividade PNDS Baucau foin tama iha faze kuotasaun

Diretór Servisu PNDS Munísipiu Baucau, Amaro Gusmão Gama Fernandes. Imajen Agência TATOLI/Natalino Belo.

BAUCAU, 29 maiu 2024 (TATOLI) – Implementasaun atividade Programa Nasionál ba Dezenvolvimentu Suku (PNDS) ba 2024 iha munisípiu Baucau daudaun ne’e foin tama iha faze koutasaun, nune’e seidauk bele realiza atividade sira ne’ebé trasa ona.

Diretór Serbisu PNDS Delegasaun Territoriál munisípiu Baucau, Amaro Gusmão Gama Fernandes, esplika katak maski halo ona lansamentu ba atividade iha inisiu tinan-ne’e, maibe PNDS iha Baucau seidauk bele implementa tanba iha projetu balun ne’ebé presiza halo rekonfirmasaun, liuliu ba fatin halo projetu sira.

“Ami fó ona orientasaun ba Ekipa Jestaun Suku, Konsellu Suku no ami-nia fasilitidór sira iha postu, agora sira prepara ona kuotasaun”, Amaro Fernandes hateten iha Vila nova, ohin.

PNDS Baucau iha ona planu no atividade regulár ba tinan-ne’e, ne’ebé husi kada suku sei hala’o estensaun ba bee-moos no sistema bomba, konstrui muru protesaun ba eskola, harii instalasaun saúde, kria sala de aula, reabilita estrada, kosntrui sentru agríkola no irrigasaun.

Amaro Fernandes argumenta katak Governu liuhusi Ministeriu Administrasaun Estatál (MAE) husu projetu iha nivél suku tenke ezekuta hotu Dezembru 2024, tanba iha tinan sira liubá kuaze atividade barak mak la implementa hotu, nune’e orsamentu ne’ebé aloka iha de’it iha konta suku nian.

Dirijente ne’e mós husu ba ekipa fasilitidora PNDS ne’ebé destakada iha kada postu administrativu atu aselera prosesu kuotasaun hodi implementasaun serbisu iha terrenu tuir  tempu ne’ebé determina ona.

“Hau fó xamada ikus katak labele liu fulan-Dezembru. Hakarak ka lakohi ita tenke remata iha tinan-ne’e”, reponsavel ne’e akresenta.

Munisípiu Baucau hetan alokasaun orsamentu iha 2024 ba PNDS hamutuk $2.667.250, ne’ebé sei gasta ba kustu administrasaun no operasionál.

Notísia relevante: PNDS seidauk reabilita estrada rurál iha Buruma

Jornalista: Natalino Belo 

Editora: Maria Auxiliadora

iklan
iklan

Leave a Reply

iklan
error: Content is protected !!