BAUCAU, 29 maiu 2024 (TATOLI) – Programa Nasionál ba Dezenvolvimentu Suku (PNDS) seidauk reabilita estrada rurál iha suku Buruma, postu administrativu Baucau Vila, tanba iha redusaun ba kustu orsamentu ba atividade ne’e.
Verba ba reabilitasaun estrada ne’e mai husi 2023 nian no, tuir planu, sei reabilita estrada husi sede suku Buruma to’o fatin turizmu Maubai ho distánsia kilómetru 2-resin ne’ebé sei benefisia komunidade husi aldeia Tasi no Kaeasamutu.
Xefe Suku Buruma, Libório dos Santos Freitas, esplika katak atividade referida nu’udar programa regulár ne’ebé ladauk implementa tanba iha redusaun ba kustu orsamentu, nune’e fo impkatu ba reabilitasaun estrada iha suku-ne’e.
“Iha mudansa ba orsamentu tuun to’o rihun $46 mak to’o ohin loron la implementa serbisu”, xefe suku Buruma informa iha Vila Antiga, ohin.
Projetu reabilitasaun estrada rurál 2023 sei kontinua no sei implementa iha tinan ne’e, tanba parte autoridade suku hamutuk ho tékniku PNDS finaliza ona dezeñu mezmu iha redusaun orsamentu ba reabilitasaun estrada ne’e.
Libório Freitas dehan bainhira reabilitasaun estrada ne’e retama mak bele fasilita ona populasaun sira hodi asesu ba transporte ho diak, inklui bele hafásil movimentasaun transporte, liuliu turista sira ne’ebé hakarak vizita fatin turizmu hanesan nuu kle’uk iha área Maubai.
“Estrada ne’e ita liga ba área turizmu nian, entaun benefisia ba ema hotu. Estrada ne’e konsidera hanesan dalan alternativu, tanba bá Teulale no Uataboo bele liuhusi dalan ne’e”, Libório Freitas akresenta.
Diretór Serbisu PNDS Delegasaun Territoriál munisípiu Baucau, Amaro Gusmão Gama Fernandes, garante atividade reabilitasaun estrada tinan 2023 iha suku Buruma sei implementa iha tinan ne’e.
Nia esplika kona-ba razaun halo redusaun ba orsamentu tanba atividade regulár seluk hanesan reabilitasaun kanu bee-moos kanseladu, inklui halo revizaun dezeñu ba estrada diresaun ne’e tanba sei konstrui ponte ida ne’ebé presiza ajusta tuir medida iha livru matadalan PNDS nian.
“Ponte ida iha ne’ebá kuaze metru 10 la tama matadalan PNDS nian. Tanba tuir matadalan PNDS, ba ponte to’o deit metru 4, maibe prosesu revizaun hotu ona, agora prepara BoQ”, Amaro Gama hateten.
Antes ne’e, suku Buruma iha 2023 hetan alokasaun orsamentu husi PNDS hamutuk rihun $59-resin, maibé agora redús ba rihun $13, nune’e sei utiliza orsamentu hamutuk rihun US$46.256,06.
Jornalista: Natalino Belo
Editora: Maria Auxiliadora
