BAUCAU, HEADLINE

Autoridade lokál husu atu apoia ekipamentu serbisu ba Pesoál Apoia Suku

Autoridade lokál husu atu apoia ekipamentu serbisu ba Pesoál Apoia Suku

Xefe suku Samalari, Rui Sertório Magno Sequeira. Imajen Agência TATOLI/Natalino Belo.

BAUCAU, 29 maiu 2024 (TATOLI) – Autoridade lokál husu Governu disponibiliza ekipamentu ba Pesoál Apoia Administrasaun Suku (PAS) ne’ebé daudaun halao knaar iha kada suku.

Xefe suku Samalari, postu administrativu Baucau Vila, munisípiu Baucau, Rui Sertório Magno Sequeira, apresia ho desizaun Ezekutivu hodi aumenta PAS iha kada suku ho kedas deskrisaun serbisu ne’ebé diferente, nune’e tulun atu halo atendementu no kria planu no atividade hodi dezenvolve suku.

“Na’in-haat [PAS] agora iha hotu ona, maibé atu orienta sira oinsá? Komputadór ida de’it, entaun estrutura mak boot hanesan amostra deit”, xefe suku Samalari hateten iha Vila Antiga, ohin.

Rui Sequeira solisita ba Governu presiza apoia tan komputadór, nune’e halao knaar tuir idaidak nia área serbisu, tanba iha suku iha de’it komputadór ida, nune’e fá impkatu ba prestasaun serbisu PAS nian.

Bainhira kada PAS iha komputadór, bele hafasil serbisu nune’e fasilita Governu hodi asesu kona-ba dadus hotu hanesan totál populasaun, inklui rekursu hotu iha suku sira.

“Bele ona halo mudansa ba ita-nia atendementu iha povu nia-leet. Sai uniforme, tanba bele ona asegura suku halo planu halo di’ak liután”, Rui Sequeira akresenta.

Aleinde ne’e, Governu presiza fó formasaun ba PAS sira, nune’e iha bele iha koñesimentu kona-ba regra administrasaun iha suku.

Governu liuhusi Ministériu Administrasaun Estatál (MAE) bazeia ba Dekretu-lei númeru 81/2023, loron 11 Outubru, ne’ebé rekruta ona PAS hamutuk na’in-haat hodi destaka ba kada suku hanesan Sekretáriu Administrasaun Suku, Ofisiál Finansa Suku, Ofisiál Administrasaun Suku no Ofisiál Asuntu Sosiál Suku.

PAS sira ne’e asina kontratu termu sertu ho kedas saláriu variedade hanesan Sekretáriu Suku kada fulan simu vensimentu $170, enkuantu na’in-tolu seluk haesan Ofisiál Finansa Suku, Ofisiál Administrasaun Suku no Ofisiál Asuntu Sosiál Suku kada fulan hetan $150.

Munisípiu Baucau rasik destaka ona PAS hamutuk 234 iha suku 59 no sei kompleta tan na’in-rua tanba rezigna aan hanesan iha suku Lacoliu, postu administrativu Quelicai, no suku Uailili, postu Baucau Vila.

Notísia relevante: Pesoál Apoia Suku na’in-234 asina kontratu serbisu ho suku 59 iha Baucau

Jornalista: Natalino Belo 

Editora: Maria Auxiliadora

iklan
iklan

Leave a Reply

iklan
error: Content is protected !!