DILI, 29 maiu 2024 (TATOLI)—Governu liuhusi Ministériu Transporte no Komunikasaun (MTK) estabelese ona liña koordenasaun hodi asegura konetividade liga ho internet, iha fatin sira-ne’ebé sai hanesan fatin destakamentu bainaka sira durante vizita Amu Papa iha Timor-Leste, iha loron 09 to’o 11 setembru 2024.
Ekipa konjunta ne’ebé tama iha liña koordenasaun ne’e mak hanesan Diresaun Nasionál Infraestrutura Komunikasaun (DNIK), Autoridade Nasionál Komunikasaun (ANC, sigla portugés), no Ajénsia TIC Timor, I.P
“Entaun, liuhusi kooperasaun serbisu ne’ebé ita halo, DNIK sei oferese kapasidade internet hamutuk 700 Mbps (Megabits per second), mínimu 200 Mbps no másimu 500 Mbps. Ita sei haree situasaun tanba orientasaun husi Primeiru-Ministru Xanana mai ne’e tenke asegura másimu tanba eventu ida-ne’e importante ba ita,” Diretór Nasionál Infraestrutura Komunikasaun, Ambrosio M.B. Amaral, informa ba Agência Tatoli, iha nia knaar fatin, MTK, Caicoli, kuarta ne’e.
Notísia relevante : Amu Papa mai Timor-Leste ho misaun rua
Nia dehan, DNIK oferese kuota liña internet ba fatin-rua ne’ebé define ona durante vizita Amu Papa.
“Ita halo ona survey ba fatin sira-ne’ebé sei fornese liña internet ho di’ak durante vizita Papa, iha fatin rua hanesan Aeroportu Comoro no Otél Hilton, tuir planu Aeroportu sei tau 200 Mbps no Otél Hilton rasik mak 500 Mbps. Ida-ne’e sai prioridade liu tanba sei sai mídia center ba jornalista 185 sira-ne’ebé akompaña Amu Papa mai Timor-Leste,” nia akresenta.
Nune’e, ekipa sei koordena ho otél-na’in, iha semana daruak fulan-juñu, atu dada konektividade fiu fibra ótika ba ne’ebá hodi halo preparasaun.
Enkuantu, ANC rasik mós sei haree liu ba koordenasaun ho públiku ba operadór telekomunikasaun tolu hanesan Timor Telecom, Telemor no Telkomcel atu asegura liña internet durante eventu nune’e bele hetan konetividade di’ak no parte TIC Timor, I.P sei haree sistema sira-ne’ebé sei halo interkoneksaun ba jornalista sira no entidade relevante seluk.
“Esforsu hotu ami halo hodi garante liña internet ne’ebé di’ak durante vizita Amu Papa,” nia tenik.
Jornalista : Arminda Fonseca
Editora : Julia Chatarina
