INFPM sosa ai-moruk no konsumavel hamutuk 556 item
DILI, 29 maiu 2024 (TATOLI) – Diretór Aprovizionamentu iha Institutu Nasionál Farmasia no Produtu Medikamentu (INFPM), Mariano da Silva, informa, INFPM sosa ona ai-moruk no produtu konsumavel no hatama ona ba iha INFPM.
Mariano da Silva, hateten, INFPM simu item to’o iha fulan-maiu ne’e kona-ba item ne’ebé sira halo ona kompras mak 556 item kompostu husi ai-moruk konsumavel no reajente inklui oxijeniu.
“Ita hatene katak INFPM la’ós hola de’it medikamentu, maibé hola ho mós reajente no konsumavel ba servisu laboratóriu territóriu laran tomak”, Diretór Aprovizionamentu INFPM, Mariano da Silva, hato’o ba TATOLI, iha Kampu Alor.
Ai-moruk husi totál 556 item ne’e mak hanesan Paracetamol 500mg tabs, ibuprofen scorred 400mg tabs, Aluminium hidrosyde 500mg tabs, Hydrocortisone Sodium Succinate Injection 100mg Vial no seluk tan.
Iha tan mós 119 item ne’ebé sei to’o to’o iha juñu, maibé INFPM mós halo hela kompras ba emerjénsia ne’ebé semana oin sei to’o ho item 30.
Diretór ne’e garante hosi 30 item ne’ebé mai iha semana oin ne’e se garante stosk ai-moruk iha INFPM.
“Sasan sira ne’e tama iha ami nia armazein, nia bele reduz stock out ne’ebé atualmente 30% ba iha porsentu rua ka tolu de’it”, nia hateten.
Nia garante, INFPM kontinua halo hela konkursu públiku ba kompras ai-moruk hamutuk 50 item ne’ebé komisaun juri sei avalia ba empreza importadora sira.
Mariano da Silva dehan totál ai-moruk ne’ebé husi totál orsamentu $4.2 millaun ne’ebé ezekuta ona osan $1.9 millaun.
Diretór ne’e hateten ai-moruk sira ne’e balun distribui ona ba iha ospitál, sentru saúde no postu saúde sira.
Jornalista: Jesuína Xavier
Editór: Cancio Ximenes
