DILI, 29 maiu 2024 (TATOLI)—Prezidente autoridade Rejiaun Administrativa Oé-Cusse Ambeno (RAEOA), Rogério Tiago de Fátima Lobato, hateten Primeiru-Ministru (PM), Kay Rala Xanana Gusmão deside ona atu halo auditória internasionál ba ró Haksolok ho aviaun ZEESM.
Notísia Relevante: Xanana Gusmão prontu responsabiliza Ró Haksolok
“Aviaun ne’e tenke la’o ba oin. Primeriu-Ministru deside tenke halo auditória ida internasionál ne’e para ita labele dehan partidariza. Tenke iha auditória internasionál ema husi li’ur mak halo, sira mak sei ba-mai rona RAEOA no rona tékniku sira hotu, depois sei ba to’o Canada rona autoridade avisaun sívil. No, kona-ba ró Haksolok señor Primeiru-Ministru mós dehan katak sei halo auditória internasionál ida. Maibé, nia dehan katak auditória nia rezultadu kuandu sai sei hakslok povu Timor-Leste tomak. Tanba, povu TL sei hatene verdade loloos kona-ba ró ne’e,” nia hateten ba jornalista sira iha resintu Parlamentu Nasionál, kuarta ne’e.
Nia dehan, ró Haksolok ne’e istória ida naruk, sira halo pagamentu dahuluk ba empreza Portugál nian ida maibé empreza ne’e bankarota tiha ona no nia iha konta dívida barak ho banku sira iha Portugál.
Entaun, nia dehan, osan Timor-Leste nian atu tama selu ró ne’e osan ne’e la ba iha selu ró ida, maibé ba tiha empreza ne’e nia konta hodi selu tusan, depois agora sira haruka tan millaun $14.
“Ami simu ona informasaun, grave liu mak ida-ne’e, katak estaleiru figeira da fogo ne’e la’ós privadu maibé propriedade Estadu Portugés maibé ita husik auditória mak sei la’o, no depois ita sei hatene verdade loloos,” nia hateten.
Notísia Relevante: PA RAEOA : “progresu konstrusaun Ró Haksolok atinje ona 75%”
Jornalista : Nelson de Sousa
Editór : Cancio Ximenes
