iklan

SAÚDE, VIQUEQUE

SSM Viqueque kapasita pesoál saúde kona-ba tékniku atendimentu no jestaun kazu 

SSM Viqueque kapasita pesoál saúde kona-ba tékniku atendimentu no jestaun kazu 

Sentru Internamentu Viqueque. Imajen Tatoli/Vitorino Lopes da Costa

VIQUEQUE, 29 maiu 2024 (TATOLI)-Servisu Saúde munisípiu Viqueque, kapasita profisionál saúde sira sira kona-ba tékniku atendimentu no jestaun kazu moras tuberkolojia, dengue no má nutrisaun iha munisípiu Viqueque.

Tuir diretór Servisu Saúde Munisípiu Viqueque, Aljacsono S. Maia, kapasitasaun ida-ne’e prioridade ba profesionál saúde sira hanesan médiku no enfermeiru sira-ne’ebé servisu iha postu saúde, sertru saúde no ospitál Internamentu hodi hasa’e sira-nia koñesmentu oinsá atu halo jestaun ba moras sira.

“Formasaun ne’ebé ami oferese ne’e importante ba ita-nia profesionál sira, atu iha koñesementu ida-ne’ebé di’ak hodi halo jestaun ba kazu moras hanesan TBC, kazu dengue no má nutrisaun nian. Ho formasaun tékniku ida-ne’e bele ajuda ita-nia pesoál saúde sira-ne’ebé durante ne’e seidauk hetan formasaun ba área tolu”, Aljacsono S. Maia, hateten ba jornalista sira, hafoin ensera formasaun, iha salaun SSM Viqueque, Viqueque Vila, ohin.

Nune’e nia dehan, ba oin SSM Viqueque kontinua tau planu perioridade hodi fó kapasitasaun ba profesionál sira atu atuliza koñesementu tanba pesoal saúde sira-ne’e maka hasoru abitante sira iha munisípiu Viqueque.

“Kona-ba formasaun ne’e ami planea ona ne’ebé kada tinan ita sempre fó formasaun ba pesoál saúde sira, atu nune’e fó atendementu ne’ebé ho kualidade no jere moras,” nia akresenta.

Tuir ezekutivu ne’e, formasaun ba área TBC, dengue no má nutrisaun,  formadór husi ofisiál SSM Viqueque ne’ebé antes ne’e hetan ona formasaun husi Ministériu Saúde (MS) hodi fó fali formasaun ba pesoál saúde sira iha munisípiu Viqueque.

Iha fatin hanesan, Enfermeiru, Jacob Soares Sarmento, dehan, liuhusi formasaun sira-ne’e hodi mellora koñesimentu tanba ne’e formasaun sira-ne’e importante ba pesoál saúde hodi halo tékniku jestaun ba kazu moras sira.

“Ha’u sente matéria sira-ne’e la’ós buat foun ba ami. Tanba iha universitáriu ami hetan ona, maibé balun ami haluha ona. Nune’e liuhusi formasaun ida-ne’e ami bele relembra fali ba jestaun moras TBD, Dengue no Má nutrisaun, ami ba fali fatin servisu bele implementa matéria sira-ne’ebé hetan iha formasaun. Ha’u prefere ba oin kontinua realiza nafatin formasaun sira-ne’e hodi eleva ami-nia koñesementu,” nia hato’o.

Entretantu, formasaun ne’e hetan partisipasaun husi médiku, enfermeiru ne’ebé serbisu iha postu saúde 43, sentru saúde lima no ospitál internamentu hamutuk na’in-70 no formasaun ne’e hahú segunda no ramata kuarta ne’e.

 

Jornalista   : Vitorino Lopes da Costa

Editór         : Florêncio Miranda Ximenes

iklan
iklan

Leave a Reply

iklan
error: Content is protected !!