POLÍTIKA, SEGURANSA

Deputadu Komisaun B apela membru GAM hadomi malu nu’udar timoroan

Deputadu Komisaun B apela membru GAM hadomi malu nu’udar timoroan

Vitíma ne'ebé hetan kanek bainhira mosu konfrontu entre joven iha área Vila Antiga, Baucau Vila, kuarta (29/05). Imajen espesiál.

DILI, 31 maiu 2024 (TATOLI)—Deputadu membru komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), Natalino dos Santos, apela membru Grupu Arte Marsiál (GAM) atu hadomi no respeita malu nu’udar timoroan hodi bele hamutuk dezenvolve Timor-Leste.

Notísia Relevante: Konfrontu iha Baucau estraga komunidade nia uma no ema na’in-rua kanek

Nia lamenta relasiona ho konfrontu ne’ebé deskonfia envole husi membru GAM balun akontese iha 29 maiu iha área Vila Antiga to’o Teulale, munisípiu Baucau Vila, estraga komunidade nia uma no ema na’in-rua hetan kanek.

“Ne’e lamenta tebes, ita lahatene saida mak ida-ne’e, serake ita-nia konsiénsia nu’udar timoroan mak laiha ka, agora fila-fali ba ita-nia alin sira-ne’ebé prátika arte marsiál. Imi tenke tau hanoin Timor ne’e ida de’it, ita ne’e hanesan feton ho naan nian de’it, buka hadomi malu bá,” nia hateten ba jornalista sira iha resintu Parlamentu, sesta ne’e.

Se se agora, nia dehan, arte marsiál Governu suspende hela atividade, maibé membru balun kontinua prátika aktu ne’e, nune’e  bolu atensaun liuliu responsável GAM sira atu fó orientasaun ba membru sira atu hakmatek hodi bele fó fila-fali tempu aplika fali atividade, se nune’e nafatin bele taka dalan.

“Maibé nu’udar timoroan hadomi no respeitu malu tanba ita ida-idak feton ho naan de’it, nusa  mak ita baku malu nafatin. Tempu baku malu liu tiha ona, iha tempu okupasaun Indonézia, agora timoroan hamutuk kaer liman dezenvolve ita-nia rain Tan ne’e, hanoin ita-nia moris, ita-nia future, tanba futuru iha ita-nia liman laran rasik,” nia dehan.

Kona-ba Governu suspende atividade GAM maibé iha membru GAM balun kontinua prátika aktu krime ba sansaun saida mak hasoru ne’e, nia dehan, depende ba órgaun kompetente no asaun sira-ne’e membru balun de’it nune’e presiza prosesa tuir lei ne’ebé iha.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!