DILI, 31 maiu 2024 (TATOLI)–Empreza RMS Engineering and Construction no DXN Limited ne’ebé halo instalasaun ba estasaun aterrajen ka cable landing station (CLS) kabu submarinu fibra ótika, iha Bebonuk-Dili entrega ona obra ba Governu liuhusi Ministériu Transporte no Komunikasaun (MTK).
“Obra instalasaun ba estasaun aterrajen ne’e kaer husi empreza rua no finaliza ona. Iha semana kotuk liubá empreza entrega ona ba MTK no empreza DXN kontinua halo instalasaun ba sistema,” Diretór Nasionál Infraestrutura Komunikasaun MTK, Ambrosio Amaral, informa ba Agência Tatoli, iha ninia knaar fatin MTK, Caicoli, foin lalais ne’e.
Aleinde ne’e, iha tan empreza lokál ida ho naran Solo Dobuno, Lda mak halo morru haleu ba estasaun CLS ne’e.
Ró ne’ebé tula kabu submarinu husi Fransa daudaun tama ona Singapura no tuir planu juñu nia rohan sei atraka iha Bebonuk.
“Antes ró ne’e to’o, daudaun empreza DXN mak kontinua instalasaun sistema no servisu iha iterinu CLS ne’e kontinua tan mak empreza Alcatel Submarine Network (ASN) sei resposabiliza ba instalasaun kabu submarinu ba Austrália,” nia akresenta.
Notísia relevante : Empreza finaliza ona infaestrutura CLS ba kabu fibra ótika iha Bebonuk
Ró ne’ebé tula infraestrutura ne’e la’o ho distánsia purvolta kilómetru 650.
Governu asina akordu ho empreza rua atu hahú konstrusaun sivíl ida nomós instalasaun kabu aterrajen iha Bebonuk. Prosesu ne’e la’o kleur tanba konkursu loke kedas desde Governu anteriór, nune’e selebra akordu atu empreza sira bele hahú konstrusaun.
Konstrusaun ne’e sei realiza husi empreza RMS Engineering and Construction, enkuantu instalasaun aterrajen kabu husi empreza DXN Limited.
Governu selebra akordu ho empreza Alcatel hodi halo produsaun kabu iha Fransa no dada fiu husi tasi okos.
Projetu rua iha Bebonuk ne’e husi parte Timor-Leste no orsamentu mai husi orsamentu Estadu.
Orsamentu ba konstrusaun hamutuk millaun $2,4, no instalasaun aterrajen kabu ne’e millaun $1-resin.
Jornalista : Arminda Fonseca
Editora : Julia Chatarina
