MUNISÍPIU, VIQUEQUE

Estrada nakonu ho tahu, Autoridade Bahatata husu MOP normaliza hodi fasilita movimentu ema-transporte

Estrada nakonu ho tahu, Autoridade Bahatata husu MOP normaliza hodi fasilita movimentu ema-transporte

Komunidade Bahatata sira dada karreta truck ida ne'ebé labele utrapasa tanba tahu nakonu iha estrada. Imajén/espesiál.

VIQUEQUE, 31 maiu 2024 (TATOLI)- Autoridade lokál iha suku Bahatata no komunidade husu ba Governu liuhusi Ministru Obra Públiku (MOP), atu normaliza estrada tanba kondisaun grave tebes no nakonu ho tahu, hodi difikulta movimentu ema no trasporte iha tempu udan.

“Kondisaun estrada ne’ebé liga mai ami-nia suku ne’e grave tebe-tebes, Tanba agora karreta no motorizada mós tama la di’ak hodi difikulta komunidade sira labele lori produtu lokal ba merkadu. Ami ba enkontru ruma iha  postu ami tenke la’o ain. Nune’e husu ba Governu atu halo normalizasaun ka halo konstrusaun ba estrada ne’e hodi fasilita movimentasaun ema no transporte,” Xefe Suku Bahatata, Patrício Maria Pinto, hateten ba Agência Tatoli, iha kna’ar fatin.

Kondisaun  estrada hahú husi diresaun postu Uatucarbau  liga bá suku Bahatata, Irabin de Cima,  Loiulu no Afaloikai kuaze estrada aat tanba laiha bee-dalan, hodi bee nalihun iha estrada halo estrada sai tahu dodok.

Ho kondisaun referidu, autoridade lokál ne’e hasoru direta ona ho Vise-Ministru Obras Públiku (MOP) no ninia asesór sira atu tau atensau urjente ba estrada iha suku Bahatata.

“Vise ministru hateten ba ha’u katak  daudaun tékniku sira dezloka ba tiha Suai, depois tékniku sira fila husi Suai mak dezkola fali ba  ami-nia suku. Maibé horikalan ha’u simu fali telefone husi asesór Vise Ministru nian dehan katak udan para oituan mak tékniku na’in-haat no funsionáriu na’in-12 mai halo levatamentu husi Postu Baguia to’o Uatucarbau. Nune’e, ha’u hein de’it bainhira mak tékniku sira mai haree ami-nia kondisaun estrada sira-ne’e”, informa Xefe Suku ne’e.

Kona-ba normalizasaun emerjénsia, Xefe suku ne’e hasoru ona Prezidente Institutu Jestaun Ekipamentu Apoiu Dezenvolvimentu Infraestutura, Institutu Públiku (IGEADI,I.P), maibé sira labele responde ba tanba kestaun orsamentu laiha. .

“Prezidente IGEADI,I.P,  dehan daudaun ne’e  labele responde ho emerjénsia hanesan halo normalizasaun tanba laiha orsamentu, Nune’e nia husu ha’u hatama pedidu ba IGEADI,I.P, maibé atende iha tinan 2025 fali”, nia lamenta.

Konstrusaun UNP paradu tanba estrada aat

Iha fatin ketak, Administradór Postu Administrativu Uatucarbau, Anacleto D. Sarmento, rekoñese kondisaun estrada ne’ebé liga suku haat ho kondisaun greve ne’ebé difikulta tebe-tebes abitante sira no difikulta ba konstrusaun Uma Naroman ba Povu (UNP) ne’ebé halo iha suku sira paradu.

“Ha’u mós halo ona koordenasaun ho parte relevante sira liuliu Ministériu Obras Públika, atu toma atensaun ba kondisaun estrada ne’ebé aat tanba difikulta ba ami-nia abitante labele lori sai sira-nia produtu lokál asesu ba merkadu no konstrusaun Uma Naroman ba Povu (UND) paradu tanba karreta labele tama hodi lori materia konstrusaun. Nune’e ha’u husu ba ministériu relevante tau matan urjente ba estrada refere hodi fasilita povu”, nia sujere.

Hataan ba kestaun ne’e, Prezidente Autoridade Munisípiu (PAM) Viqueque, Francisco C.S de Gonzaga Soares, relata autoridade laiha orsamentu atu halo normalizasaun ba estrada iha suku refere ho lais.

“Tanba ne’e, ami nafatin kontaktu ba nasionál mak responde hanesan mosu emerjénsia ruma. Tanba kona-ba dalan sira-ne’ebé valór orsamentu liu  rihun $500 ne’e ami labele halo, ami tenke koopera ho nasionál mak responde,” PAM ne’e esplika.

PAM mós nota katak estrada sira iha Viqueque kuaze kondisaun grave hotu hanesan hahú husi Asalaitula to’o Viqueque, Viqueque to’o Uatulari no Uatulari to’o Uatucarbau.

“Dalan sira-ne’ebé emerjénsia ita so rezolve ho IGEADI,I.P, se sira labele rezolve pasiénsia hein hodi ami buka fali dalan seluk atu bele halo normalizasaun ba estrada refere”, nia promete.

Estrada ne’ebé liga husi postu Uatucarbau purvolta kilométru 21, ne’ebe benefisia ba populasaun iha suku Loiulu, Afaloikai, Irabin de Cima no suku Bahatata.

Tuir demógrafia postu Uatucarbau iha suku haat ne’ebé dook husi postu mak hanesan suku Afaloikai ho totál aldeia haat, abitante 2.023, ho totál uma-kain 401, suku Bahatata  totál aldeia 4, ho abitante 980, ho totál uma-kain 193, suku Irabin de Cima totál aldeia lima, totál abitante 1,269, ho totál uma-kain 265 no suku Loi Ulu totál aldeia lima, ho totál abitante  1.274, no  ho totál uma-kain 228.

Notisia relevante: Estrada liga bá suku Bahatata Viqueque a’at difikulta abitante asesu merkadu

Jornalista   : Vitorino Lopes da Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!