SOSIEDADE SIVĺL

Igreja timorense sei intensifika orasaun ba vizita Papa nian

Igreja timorense sei intensifika orasaun ba vizita Papa nian

Arsebispu Arkidioseze Metroplitana Dili, Dom Virgílio Kardeál do Carmo da Silva, SDB. Imajen Tatoli/Francisco Sony.

DILI, 30 maiu 2024 (TATOLI) – Arsebispu Arkedioseze Metropolitana Dili, Dom Virgílio Kardeal do Carmo da Silva, SDB, informa, Igreja timorense sei intensifika orasaun ba vizita Amu Papa nian iha fulan tolu ikus mai ne’e.

Kardeál hateten, orasaun ne’ebé prepara hosi Konferénsia Episkopál Timorense hodi fahe ba parokia sira hotu atu sarani sira bele reza loroloron nu’udar preparasaun espirituál sarani timoroan hodi simu Amu Papa nia vizita.

“Preparasaun sira la’o hela, hanesan imi rona ohin iha ne’e fó sai ona katak iha fulan tolu ikus ne’e ita mós sei intensifika ita-nia preparativu sira ba vizita Amu Papa nian ho saída? Primeiru, hahú husi domingo ida mai ne’e, parokia hotuhotu sei hahú halo orasaun ida ne’ebé konferénsia Episkopál prepara tiha ona atu konvida sarani hotuhotu reza”, Arsebispu Arkedioseze Metropolitana Dili, Dom Virgílio Kardeal do Carmo da Silva, SDB, hato’o ba jornalista sira, iha selebrasaun solenidade Corpo de Deus, iha Lecidere.

Arsebispu esplika, vizita Amu Papa ninian la’ós vizita baibain, maibé vizita ida-ne’ebé iha nia benefísiu espirituál ba povu Timor-Leste.

“Nu’udar xefe igreja, nu’udar saseluk Cristo nian iha rai ne’e, ita hakarak vizita ida-ne’e sai momentu ida di’ak ida mai ita, tanba ne’e ita halo preparasaun espirituál ne’e ita hahú iha dia dois domingu ne’e to’o setembru nia laran, ita hahú kedas ho orasaun”, nia tenik.

Kardeál hateten, parte gráfika nasionál prepara tiha ona, imprime hotu ona orasaun sira ne’e hotu, hein fahe ba parokia sira, tanba ne’e mak parokia hotuhotu ka maioria parokia sei hahú ona reza sira-nia orasaun ne’e iha domingu ne’e.

Ba sira ne’ebé la asesu ba imajen ka orasaun ne’e, tanba limitadu, ita prepara iha sekretariadu parokia hodi bele ema hotuhotu reza.

Aleinde orasaun espirituál, sei hahú mós formasaun no preparasaun ligadu ho Amu Papa nia vizita. Ekipa ida sei tuun ba dioseze no parokia sira atu halo formasaun no preparasaun ne’e durante semana tolu nia laran.

Iha sorin seluk, Pároko Balide, Padre Ângelo Salsinha, hateten, simu ona panfletu orasaun ba Amu Papa nia vizita hodi bele reza hamtuk ho sarani sira.

“Orasaun ne’e atu reza loroloron. Hahú husi juñu”, padre Ângelo hato’o ba Tatoli liuhusi telefone.

Jornalista: Jesuína Xavier

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!