DILI, 31 maiu 2024 (TATOLI)—Reprezentante povu iha Parlamentu Nasionál (PN) liuhusi Deputadu CNRT, Natalino dos Santos, husu Ministériu Obra Públika (MOP) prioriza implementasaun polítika dijitalizasaun sistema hodi bele solusiona probelma ahi mate-lakan.
“Ha’u haree la sala ministru Obra Públika ko’alia situasaun ne’e ba sistema dijitalizasaun, tanba se lae ahi mate tékniku sira tenke la’o leno ho lampda buka tuir fiu aat iha ne’ebé, haree Governu Konstitusionál da-sia iha tiha ona planu ne’e. Ita espera katak, ba oin ne’e ita tama ona ba dijitalizasaun, depois ahi mate iha ne’ebé ita deteta lalais téknika sira tún para atu normaliza fila-fali,” nia hateten hodi responde Agência Tatoli iha resintu Parlamentu, sesta ne’e.
Nia dehan, preokupasaun ahí mate durante ne’e uza hela sistema manuál, ezemplu bainhira ahi mate iha Hera ne’eba dalaruma buka fali iha Tibar ne’eba, entaun dijitalizasaun sistema importante atu deteta ho lalais.
Nune’e, reprezentante povu ne’e husu atu bele foku implementa ona polítika dijitalizasaun ne’e hodi solusiona lalais ahi mate.
Antes ne’e, iha reuniaun plenária, Deputada FRETILIN Sanhia Paixão Bano, preokupa ho ahi mate lakan ida-ne’e fó impaktu tebes hanesan iha Hospitál Nasionál Guido Valedares (HNGV, siglá portugés) prejudika atendimentu pasiente sira.
Deputada FRETILIN, Maria Angélica Rangel, mós preokupa ahi mate lakan prejúdika populasaun sira-nia sasán eletróniku bele hetan estragu.
Notísia Relevante: HNGV planeia sei sosa jeradór iha 2025 hodi garante funsionamentu ahi
Jornalista : Nelson de Sousa
Editór : Cancio Ximenes
