iklan

SOSIEDADE SIVĺL

Sosiedade sívil rejionál hili asuntu neen diskute iha konferénsia ACSC/APF

Sosiedade sívil rejionál hili asuntu neen diskute iha konferénsia ACSC/APF

ONG husi nasaun membru ASEAN hala’o diskusaun ho tema Fórum Povu ASEAN, “Regional Steering Committee Meeting” (ACSCAPF), iha Yayasan Hak, Farol, Dili, kuarta (29 maiu 2024). Imajen Tatoli/António Daciparu

DILI, 31 maiu 2024 (TATOLI) – Koordenadora ba Komisaun Organizadora Chair NOC, Elizabeth Lino de Araujo, hateten lideransa, sosiedade sívil rejionál hili asuntu neen atu diskute iha konferénsia ASEAN Civil Society Conference-ASEAN People Forum (ACSC/APF) iha fulan-setembru iha Timor-Leste.

“Durante loron tolu, ami diskute no konkorda ona asuntu neen atu lori ba konferénsia ACSC/APF iha fulan-setembru tinan-ne’e iha ita-nia rain, dahuluk mak ema serbisu-na’in neoliberalizmu no rejionalizmu alternativu, daruak violénsia Estadu militarizmu libertasaun nasionál no demokrasia, datoluk tékniku monopoliu autoritáriu dijitál no liberdade internet, dahaat krize ekolójika, direitu ambientál asuntu agrikultura no urbanu, dalima minoridade povu marjinalizadu no justisa jéneru no daneen harii pás seguransa umanu no justisa tranzitóriu”, Elizabeth Lino de Araujo, informa ba jornalista sira bainhira hala’o konferénsia imprensa iha salaun HAK Farol, ohin.

Nia dehan, membru sira husi Komisaun Diresaun Rejionál Konferénsia Sosiedade Sívil ASEAN no Forum Povu ASEAN (ACSC/APF), plataforma rejionál ida husi organizasaun sosiedade sivil ne’ebé envolve Asosiasaun Nasaun Sudeste Aziátiku (ASEAN) kona-ba isu direitu umanu sira, demokrásia, ekolójiku no seguransa, hala’o sorumutu iha Dili durante loron tolu hodi halo preparasaun ba 2024 ACSC/APF ne’ebé sei organiza husi sosiedade sivil Timor-Leste iha fulan- setembru tinan ida-ne’e.

“ACSC hahú iha tinan-2005 iha Malázia no tinan-tinan, grupu sosiedade sívil sira husi nasaun ofisiál ASEAN sai nu’udar uma-na’in hodi organiza ACSC/APF paralelu ka akompaña iha sorumutu Estadu nian (state summits). Tinan ida-ne’e organizasaun sosiedade sívil Timor-Leste nian sei organiza fali eventu ida-ne’e, ne’ebé antes ne mós hala’o ona iha 2016”, nia rekorda.

Nia afirma, desizaun signifikante sira ne’ebé lori ba Konferénsia ACSC/APF iha loron 25-27 fulan-setembru tinan-2024 inklui mós kona-ba tema “Ba Povu ida Lidera Demokrasia no Soberania iha Sudeste Aziátiku.

“Konferénsia Setembru sei diskute mós kona-ba tópiku estratéjiku sira hanesan krize ekolójika, soberania ai-han, ekonomia rejionál, direitu umanu, solidariedade internasionál, seguransa rejionál, traballadór migrasaun sira. Sei foka liu ba krize Myanmar nian. Audiénsia públika ida kona-ba Myanmar organiza husi Provedór Justisa no Direitus Umanus iha kooperasaun ho ONG rejionál sira seluk no Sentru Nasionál Chega iha 27 Maiu 2024”, nia relata.

Nia haktuir, iha tinan ne’e, ACSC/APF korresponde ho komemorasaun tinan 25 referendum populár ne’ebé loke dalan ba restaurasaun independénsia Timor-Leste nian, tinan 20 prosesu ACSC/APF nian no mós hafoin tinan 50 luta povu Timor-Leste nian ba libertasaun nasionál. Konferénsia fulan-Setembru sei hala’o semana rua hafoin apóstolu Paulo vizita Timor-Leste.

Partisipa iha reuniaun ne’e, reprezenta Rejionál Steering Committee ACSC/APF 2024 mai hosi nasaun Laos, Malazia, Myanmar, Timor-Leste, Thailandia, Cambodia, Indonézia Filipina, Vietnam, Singapura, Brunei no Rejionál Caucus.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!