COVALIMA, 31 Maiu (TATOLI) – Konsellu Veteranu munisípu Covalima simu ona orientasaun husi Ministériu Asuntu Kombatente Libertasaun Nasionál (MAKLN) atu hahú verifika no valida, iha inísiu Juñu, dadus ema mate iha funu iha suku 30.
Prezidente Konsellu Veteranu Covalima, Osório Soares ‘Mausoko’, fó hanoin katak, iha 12 Abríl, MAKLN no Komisaun Kombatente Libertasaun Nasionál (KKLN) husi kada munisípiu lansa ona programa konfirmasaun no validasaun dadus ba ema ne’ebé mate, entre 1975 no 1999, iha funu laran tanba ukun-rasik aan, iha Aisirimou, Aileu.
“Iha loron 05 Juñu, ami husi ekipa konsellu veteranu tuun ona bá suku atu halo verifikasaun no validasaun dadus hodi rejista uma-lisan ema ne’ebé mate ba ukun-rasik aan iha suku sira. Ami hahú uluk iha postu Fatululik, suku Taroman no Fatululik”, Osório Mausoko informa iha Tabakolot, ohin.
Dadus uma-lisan munisípiu Covalima husi postu hitu hanesan Fatululik, Fatumea, Fohorem, Tilomar, Maucatar, Suai no Zumalai hamutuk 13.433, Husi númeru ne’e, kestionáriu kanseladu 122, kestionáriu branku 408 no sidadaun kontra ukun-rasik aan 23.
Vise Nurep postu Fatululik , João Teles, admite katak nia parte simu ona orientasaun husi Konsellu Veteranu Covalima atu verifika no valida dadus rejistu uma-lisan.
“Tuir orientasaun ne’ebé ami simu, Konsellu Veteranu hahú verifika no valida uluk iha postu Fatululik. Ami hein de’it bainhira mak ekipa atu dezloka mai. Bazeia ba dadus, ami rejista uma-lisan hamutuk 80”, nia adianta.
Iha 2021, rejista ona uma lisan 16.259 husi munisipiu 12, husi uma-lisan ida ne’e, iha ema ne’ebé mate ba ukun-rasik aan, nomós kontra ukun-rasik aan iha territóriu hamutuk 233.951.
Notísia relevante: MAKLM lansa Programa Konfirmasaun no Validasaun Dadus ba Ema ne’ebé Mate iha 1975-1999 iha Aileu
Jornalista: Celestina Teles
Editora: Maria Auxiliadora
