MAKLM lansa Programa Konfirmasaun no Validasaun Dadus ba Ema ne’ebé Mate iha 1975-1999 iha Aileu
AILEU, 12 Abríl 2024 (TATOLI) – Ministériu Asuntu Kombatente Libertasaun Nasionál (MAKLM), Komisaun Kombatente Libertasaun Nasionál (KKLN) husi kada munisípiu no autoridade Aileu lansa Programa Konfirmasaun no Validasaun Dadus ba Ema ne’ebé Mate, entre 1975-1999, iha funu laran tanba ukun-rasik aan iha Aisirimou.
Diretór Nasionál Pensaun no Subvensaun, Manuel dos Santos Araújo, informa katak lansamentu ne’e ho objetivu atu konfirma no valida dadus ne’ebe mak lansa iha inísiu Novembru 2020 iha Aisirimou no iha 2021 halo kedas resenseamentu iha nível territóriu, eseptu Rejiaun Administrativa Espesiál Oé-Cusse Ambeno (RAEOA).
“Iha 2021, ami rejista uma lisan 16.259 husi munisipiu 12, husi uma-lisan ida ne’e, iha ema ne’ebé mate ba ukun-rasik aan nomós kontra ukun-rasik aan hamutuk 233.951 iha territóriu”, dirijente ne’e aprezenta iha ámbitu lansamentu referidu iha Aileu.
Diretór ne’e mós rekoñese katak iha aldeia no suku balun iha territóriu seidauk konsege halo rejistu iha períodu sira liubá no ekipa sei kompleta iha tempu tuirmai, inklui mós RAEOA.
Iha fatin hanesan, Ministru Asuntu Kombatente Libertasaun Nasionál, Gil da Costa ‘Oan Soru’, reforsa katak lansamentu ne’ebé realiza ohin atu konfirma dadus husi Aileu ne’ebé rejista ona no munisípiu seluk sei komesa iha semana oin.
“Objetivu prinsipál ba lansamentu ohin nia mak ita rejista dadus ema idaidak nian hanesan mártir no kombatente ba luta libertasaun nasionál”, salienta.
Ministru mós rekorda katak iha mandatu Governu anteriór bainhira nia asume kargu hanesan Sekretáriu Estadu ba Asuntu Kombatente Libertasaun Nasionál no Ministru ein ezersísiu iha momentu ne’ebá kontinua apoia programa ne’e. Nune’e, presiza halo verifikasaun tanba ema balun dehan ema ne’ebe mate ba funu durante ukun-rasik aan nia númeru laiha serteza.
“Ita atu sura Aileu oan hira mak mate ba ukun-rasik aan ba rai ida ne’e, atu sura Ermera oan hirak mak mate, inklui mós ba munisípiu sira seluk. Ita-boot sira mak hatene ema iha uma-lisan ne’e mate ba ukun-rasik aan, númeru ema na’in hira husi kada uma-lisan”, nia dehan.
Nune’e mós, Sekretáriu Asuntu Finansa Munisípiu Aileu, José Vicente Vilanova, agradese tanba bele hili Aileu sai fatin pilotu ba programa lansamentu, espesialmente iha suku Aisirimou.
Nia husu ba xefe suku sira, administradór postu, komandu eskuadra polísia Aileu atu apela ba populasaun sira hodi kolabora ho MAKLM atu fó dadus ho loloos hodi responde ba nesesidade ministériu nian. Tanba ida ne’e sei ajuda desizaun MAKLM iha tempu tuirmai bazeia ba dadus ne’ebe mak fó husi populasaun.
Nia hatutan bainhira populasaun la kontribui ikus mai Aileu oan sira mak sei reklama malu iha futuru. “Tanba ne’e, husu ba ema hothotu atu kolabora hodi bele fó susesu ba programa ida ne’e, tanba rezultadu ida ne’e la’ós ministériu nian, maibé sei filafali ba ita idaidak”, realsa.
Notísia relevante: MAKLN seidauk fó sai lista validasaun veteranu rejistradu 2009
Jornalistaː Domingos Piedade Freitas
Editora: MariaAuxiliadora
