Prezidente Repúblika husu Primeiru Ministru tau-matan ba setór saúde

DILI, 02 junu 2024 (TATOLI)– Prezidente Repúblika (PR), José Manuel Ramos Horta, husu Primeiru Ministru (PM), Kay Rala Xanana Gusmão, tau matan mak setór saúde ne’ebé oras ne’e sai preokupasaun iha sosiedade.

“Tanba falla barak iha setór saúde, grave iha ospitál, stock medikamentu sempre falta. Ha’u haree ho ha’u-nia matan rasik, dala barak iha ospitál ho kondisaun hanesan ne’ebá, klaru iha akordu ona atu halo konstrusaun ospitál foun ba cinco andár, ne’e di’ak liután maibé problema mak jestaun jerál setór saúde nian, jestaun espesífika ba Ospitál Nasionál Guido Valadares mak ladi’ak, falla,” Xefe Estadu, José Ramos Horta, ko’alia iha iha aeroporto Nicolau Lobato Dili, domingu ne’e.

Xefe Estadu nota katak mandatu Governu IX Governu liu ona tinan ida, maibé laiha jestaun di’ak ba setór saúde.

“Tinan ida nia-laran laiha jestaun ke di’ak, ha’u husu de’it ba Primeiru Ministru tau matan didi’ak ba ospitál tanba iha konsekuénsia saúde ba ema barak nia vida,” Xefe Estadu hateten.

Notísia relevante: Presiza polítika-jestaun adekaudu ba OJE hodi responde ba problema saúde

Jornalista: Osória Marques

Editór: Evaristo Soares Martins