DILI, 03 juñu 2024 (TATOLI)—Ekipa Delegasaun Organizadora Vatikana (DOV) II kompostu husi ema na’in-16 no akompaña husi Uma-kreda Timor-Leste inklui entidade balun husi Governu, segunda ne’e, halo inspesaun ba Aeroportu Internasionál Prezidente Nicolau Lobato Comoro, Dili.
“Ekipa delegasaun husi DOV II ohin mai ne’e akompaña husi Arsebispu Arkidioseze Metropolitana Dili Dom Virgílio do Carmo da Silva Belo, hamutuk ho membru Governu sira mai haree kondisaun reál aeroportu nian, liu-liu VIP, ami hatudu agora sobu hela atu halo reabilitasaun interiór,” Prezidente Konsellu Administrasaun Navegasaun Aero Timor-Leste, Romualdo da Silva, informa ba Agência Tatoli, iha Aeroportu Comoro.
Notísia relevante : Vizita Amu Papa, Komandu PNTL sei dada membru sira munisípiu hodi haforsa
Nune’e, parte seguransa husi delegasaun ne’e fó sujestaun atu halo mudansa balun hanesan iha VIP oin no kotuk.
“Tanba seguransa husi Papa nia mós hato’o katak presiza hadi’a liu-liu ba seguransa hanesan iha koridór VIP nian sei halo mudansa hanesan rampa iha VIP oin no kotuk hotu tanba ita hotu hatene kondisaun Papa nian, entaun presiza rampa para ho kadeira roda dudu tun no sa’e di’ak durante halo vizita iha Timor-Leste, ida-ne’e mak ami sei halo rampa no kondisaun jerál la’o tuir dezeñu ne’ebé iha,” nia akresenta.
Aleinde ne’e, ekipa halo mós inspesaun ba Aviaun Aero Dili ne’ebé tuir planu sei halo preparasaun tula Amu Papa.
“Loos, aviaun Aero Dili mak sei prepara tula Amu Papa fila, nune’e ohin ekipa ko’alia ho tékniku sira fó sujestaun balun ba sira atu hadi’a maibé ba situasaun no kondisaun aviaun buat hotu la’o di’ak,” nia informa.
Ho rekomendasaun sira ne’ebé ohin ekipa DOV II hato’o, hahú aban empreza responsável hahú reabilita sala VIP aeroportu nian.
“Empreza ne’ebé sei halo reabilitasaun ba VIP aeroportu Dili mak Deco Unipessoal, tanba empreza ne’e rasik mak halo reabilitasaun ba VIP no halo VIP provizóriu daudaun ita hotu haree, serbisu sira ne’e hotu ami halo ho koordensaun hamutuk ho liña ministeriál ho Ajénsia Dezenvolvimentu Nasionál (ADN) sei halo preparasaun ne’ebé di’ak,” Romualdo da Silva, relata.
Jornalista : Arminda Fonseca
Editora : Julia Chatarina
