iklan

HEADLINE

Vizita Amu Papa, Komandu PNTL sei dada membru sira munisípiu hodi haforsa

Vizita Amu Papa, Komandu PNTL sei dada membru sira munisípiu hodi haforsa

Komandante Sentru Formasaun Polísia (SFP), Superentendente, Arquimino Ramos. Imajen Tatoli/Francisco Sony.

DILI, 06 maiu 2024 (TATOLI) – Komandante Komandu Pesoál Formasaun, Superintendente Xefe Polísia, Arquimino Ramos, dehan Komandante Jerál Polísia Nasionál Timor-Leste (PNTL), Komisáriu Jerál Henrique da Costa tau ona iha planu komandu nian atu dada membru PNTL sira ne’ebé destakadu iha Komandu PNTL Munisípiu idaidak atu bele haforsa seguransa ba vizita Amu Papa mai Timor-Leste.

“Sim, Komandu PNTL nia preparativu ba vizita seguransa ba Sua Santidade Papa nian preparadu, tanba tuir planu ne’ebé mak Komandu Jerál PNTL iha sei bolu membru PNTL sira ne’ebé halo servisu iha Komandu Munisípiu mai iha Dili para bele apoiu membru PNTL sira iha Dili atu asegura vizita Sua Santidade Papa Francisco mai Timor-Leste”, Arquimino Ramos hateten ba jornalista sira bainhira halo abertura ba atividade re-treinamentu ba membru Taskforce 30 ne’ebé halao iha Unidade Espesiál Polísia (UEP), Bairro Pite, segunda ne’e.

Arquimino ladún fixa númeru efetivu ba kada munisípiu no hira mak sei apoiu membru PNTL sira iha Dili atu asegura vizita ida-ne’e.

“Komandu Jerál sei komunika ho Komandu PNTL Munisípiu sira atu haree kon-ba kestaun ida-ne’e tanba asuntu sira hanesan ne’e, Komandu Jerál sei halo desizaun bazeia ba despaisu Komandante Jerál”, nia adianta.

Nia subliña, Komandu PNTL, agora daudaun, deside halo re-treinamentu ba membru PNTL forsa rezerva ka Task force hosi munisípiu 14.

Nia dehan, formasaun ne’e sei foku ba PNTL nia atuasaun sira, oinsá mak atu uza forsa iha momentu ida ne’ebé, bainhira mak uza lei forsa no tékniku polisiál sira seluk ho objetivu atu bainhira PNTL halo atuasaun karik labele fora hosi medida sira ne’ebé PNTL iha.

“Komandu PNTL hahú re-treinamentu ba membru sira atu kontinua hasae sira-nia koñesimentu tékniku atuasaun polísiál nian no hosi atividade re-treinamentu ne’e objetivu atu fó hanoin ba membru sira bainhira halo atuasaun karik oinsá mak sira atu uza forsa no iha momentu ida ne’ebé, bainhira mak uza lei, forsa no tékniku polisiál sira seluk atu nune’e bainhira  PNTL halo atuasaun karik labele fora hosi medida sira ne’ebé PNTL iha”, nia akresenta.

Arquimino hateten, atividade re-treinamentu ne’e, Komandu PNTL  oferese ona ba  membru Task force hosi Komandu PNTL Munisípiu Aileu, Baucau, Lautém no ohin ita halao ba membru Taskforce hosi Komandu Munisípiu Dili, membru sira ne’ebé partisipa iha atividade ida-ne’e iha 30 tanba menus orsamentu no atividade ne’e halo durante semana ida”, nia dehan.

Komandante ne’e hateten, atividade re-treinamentu ida-ne’e nudar meius komandu nian atu prepara membru PNTL hosi Taskforce atu fó seguransa ba eventu bo’ot sira.

Iha fatin hanesan, Komandante Munisípiu Dili Superintendente Xefe Polísia, Orlando Gomes  hateten, atividade re-treinamentu ida-ne’e importante tebes ba membru PNTL liuliu ba Taskforce sira.

“Ita bo’ot hatene la kleur ita sei iha eventu bo’ot ida mak vizita Sua Santidade Papa Francisco mai ita-nia rai tanba ne’e mak hosi preparasaun Komandu PNTL Dili prepara membru sira atu tuir atividade re-treinamentu sira para sira bele hatene oinsá atu halo atuasaun ba konflitu sira, sira bele hatene deskobre fatin sira ne’ebé sai risku no sira mó bele iha kapasidade no estratejia hatene situasaun sira iha terenu nune’e bainhira mosu buat ruma sira bele halo atuasaun”, nia konklui.

Jornalista: Natalino Costa

Editor : Zezito Silva

 

iklan
iklan

Leave a Reply

iklan
error: Content is protected !!