DESPORTU, HEADLINE

Empata 3-3, Laisorulai FC ho Daudere FC fahe pontu ba malu

Empata 3-3, Laisorulai FC ho Daudere FC fahe pontu ba malu

DILI, 03 juñu 2024 (TATOLI)– Ekipa istimadu husi Munisipiu Baucau Laisorulai FC obrigadu tenke fahe pontu ba malu bainhira empata ho adversáriu Daudere FC 3-3, iha jogu kontinuasaun faze grupu kopa Maun Boot Kay Rala Xanana Gusmão ne’ebé realiza iha Estádiu Munisipál Dili, segunda lokoraik ne’e.

Bainhira jogu la’o jogadór ekipa rua lansa kedan kontra no atake ba malu tuir tékniku no abilidade ekipa idaidak nian oinsa mak hatama golu.

Jogu ne’e akompaña husi adeptus atus ba atus ne’ebé tur nahe-aan iha tribun Estádiu nian hodi fó suporta másimu tebes ba klube rua nia jogu. Laisorulai halo presaun ne’ebé maka’as hasoru Daudere.

Maske halo presaun Daudere la husik liu de’it, responde ho kontra atake ne’ebé adekuadu halo Laosorulai mós falla iha nia finidade.

Ho presaun ne’ebé Daudere halo la hela de’it hanesan presaun tanba jogu la’o to’o minutu 16 jogadór Daudere Rosid Soares (12) lansa ona golu primeiru muda rezultadu ba 1-0. Golu ne’e halo intensidade jogu sa’e liutan. Laisorulai la nonok, koko halo presaun ba Daudere.

Presaun ne’ebé Laisoru lai halo la hela de’it ho naran, ikus iha minutu 21 jogadór Pedro da Costa (7) responde ona golu ida hodi muda rezultadu ba 1-1. Golu ne’e halo jogu la’o manas liutan. Adeptus sira mós hakilar maka’as halo tribun Estádiu sente atu rahun.

Ho forsa jogu ne’ebé hanesan ikus minutu primeira parte termina rezultadu hela ho empata provijoriu.

Hakat ba segunda parte ekipa rua nafatin hatudu vontade ho ambisaun ne’ebé maka’as oinsa atu manán jogu. Daudere halo atake ne’ebé extraordinariu ikus iha minutu 53 jogadór Gabriel Marques (23) halo golu ida muda rezultadu ba 2-1. Golu ne’e halo adeptus Daudere nian kontente liutan, hanoin sira mak manán ona jogu ne’e.

Laisorulai nafatin hatudu jogu ho profesionál. La ansi halo golu bainhira oportunidade seidauk to’o. Maibé nafatin halo presaun ho bola, biar nune’e Laisorulai nafatin lakon bola barak husi Daudere.

Daudere halo atake ne’ebé maka’as ikus iha minutu 75 jogadór Gabriel Marques konsege halo tan golu ida muda rezultadu ba 3-1. Golu ne’e lori rezultadu halai dook ona husi Laisorulai. Laisoru lai tenke dada iis naruk hodi reziste nafatin iha kampo laran.

Luta ho pasiensia no unidade iha kampo laran ikus iha minutu 79 jogadór Laisorulai Flavio do Rosario marka golu ida hodi muda rezultadu ba 2-3. Golu ne’e fó presaun maka’as ba Daudere. Ikus Daudere la antisipa ho di’ak lakon bola barak iha minutu ikus iha minutu 82 jogadór Laisorilai Zeferino Nheu (12) termina golu ikus hametin rezultadu ba 3-3.

Golu ne’e hakoi kedan Daudere nia mehi oinsa hadau pontu tolu husi Laisorulai, nune’e ikus tenke termina jogu ho empata 3-3 fahe de’it pontu ida, ida ba malu.

Rezultadu ne’e lori Laisorulai hetan pontu hitu konfirmadu ona hakat ba jogu 16 finál no provijoriu lidera grupu H, ekipa ne’ebé okupa pozisaun segundu mak Maubale FC ho pontu tolu, Daudere FC pozisaun terseiru ho pontu tolu, no ikus liu Taibessi FC ho pontu ida.

Jogu ne’e lidera husi árbitru prinsipál Bernardinho Mascarinhas, juiz liña Filomeno da Silva, Gaspar Soares no árbitru rezerva Fernando da Costa.

Notísia relevante:Empata 0-0, Maubale FC fahe pontu ho FIEL FC iha kopa FFTL

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!