HEADLINE, SOSIEDADE SIVĺL

Governu atribui ajudu millaun $3,1 ba konstrusaun Igreja São Paulo Lautém

Governu atribui ajudu millaun $3,1 ba konstrusaun Igreja São Paulo Lautém

Vise Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino. Imajen Tatoli/Francisco Sony

DILI, 03 juñu 2024 (TATOLI)–Governu liuhusi Gabinete Apoiu Sosiedade Sivíl (GASC, sigla portugés), ne’ebé reprezenta husi Vise Primeiru-Ministru, Ministru Koordenadór Asuntu Sosiál no Ministru  Dezenvolvimentu Rurál  no Abitasaun Komunitária, Mariano Assanami Sabino, asina akordu ho parte igreja nian hodi atribui ajudu millaun $3,1 ba konstrusaun Igreza Parókia São Paulo Lautém.

“Ohin ami ho Padre Parókia asina ona akordu atu komesa konstrusaun Igreja São Paulo Parókia Lautém nian, nune’e orsamentu ba konstrusaun igreja ne’e ho totál $3.101,134,63,” Vise Primeiru-Ministru, informa hafoin asina akordu ho parte igreja, iha Palásiu Governu, segunda ne’e.

Orsamentu ne’ebé aloka daudaun ne’e husi Orsamentu Jerál Estadu (OJE) 2023 nian, ne’ebé aloka uluk millaun $1 hodi halo serbisu, hafoin haree nia progresu konstrusaun la’o mak aloka tan seguda faze iha OJE 2025.

Governante ne’e konsidera, konstrusaun edifísiu ne’e importante tebes ba Timor-Leste tanba Misionáriu portugés mai hela uluk iha ne’ebá hafoin hala’o evanjelizasaun iha fatin seluk. Prezensa Misionáriu sira-ne’e konsege forma timoroan matenek lubuk ida, liuhusi harii koléjiu Dom Bosco Fuiloro, koléjiu Dom Bosco Fatumaca, no seluk tan ne’ebé ohin loron prodús ema matenek barak hodi kontribui ba dezenvolvimentu nasionál.

“Misaun salezianu ema hotu hatene katak maihusi espíritu Dom Bosco nian, ne’ebé hanesan aman no matadalan ba joven sira. Misaun salezianu ne’e mai halo timoroan barak mak apreende no matenek to’o agora no kontinua nafatin, koléjiu Dom Bosco Fuiloro, koléjiu Dom Bosco Fatumaca, no iha fatin seluk.  Ida-ne’e hatudu mós identidade ezisténsia salezianu sira iha Timor-Leste, igreja ida-ne’e la’ós de’it konstrusaun maibé mós valór prinsípiu identidade ezisténsia salezianu nian.  Nune’e ita presiza apoiu atubele konstrui filafali igreza ne’ebé nakonu ho istória tanba husi sira ita ohin loron matenek barak,” Ministru Koordenadór Asuntu Sosiál, reforsa.

Notísia relevante : GASC no autoridade lokál inaugura igreja Betesda Naedala iha Viqueque

Konstrusaun edifísiu igreja sei hahú tinan ne’e ho durasaun serbisu tinan-tolu maibé sei aselera hodi bele ramata iha tinan-rua nia laran, nune’e sarani sira bele uza ba atividade relijiozu nian.

Iha fatin hanesan, Amu Pároku São Paulo Lospalos, Padre Venâncio Fátima Pereira, agradese ba Governu ne’ebé ho vontade tomak atribui ajudu orsamentu ba konstrusaun igreja.

“Lori sarani sira hotu nia naran, agradese ba Governu ne’ebé apoiu ona orsamentu hodi harii ita-nia igreja, nune’e bele fasilita sarani sira-nia fiar. Aleinde orsamentu husi Governu, iha mós sarani sira husi Lautém ne’ebé hela iha rai-li’ur no rai-laran mós halo kontribuisaun hotu. Nune’e agradese wain ba parte hotu nia tulun. Orsamentu hirak ne’e ita sei jere ho responsabilidade tomak hodi bele atinje ita hotu nia hakarak,” Amu Padre kompromete.

Parte tékniku halo ona levantamentu ba konstrusaun igreja referidu, ne’ebé identifika rai ho medida 75 x 40 m³.

“Atu klaru liu tékniku sei esplika ba públiku iha tempu besik bainhira konstrusaun la’o ona,” nia dehan.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!