SAÚDE

Labarik feto rihun 55 iha ensinu báziku sei simu vasina HPV

Labarik feto rihun 55 iha ensinu báziku sei simu vasina HPV

Vasinasaun Human Papillomavirus (HPV). Imajen/Espesiál.

DILI, 03 juñu 2024 (TATOLI)–Ministériu Saúde (MS) sei lansa vasina Human Papillomavirus (HPV) iha komemorasaun loron nasionál saúde ne’ebé sei selebra iha loron 22 jullu 2024, ne’ebé tuir planu sei realiza iha Ermera.

Médiku iha Ministériu Saúde, Estevão Mariz, hateten labarik ka estudante feto rihun 55 iha ensinu báziku iha territóriu mak sei simu vasina HPV.

“Iha munispiu 14 iha estudante 6 ano hamutuk 14.915, estudante 7 ano hamutuk 13.787, estudante 8 ano hamutuk 13.321 no estudante 9 ano hamutuk 13.771,” nia dehan ba jornalista sira iha enkontru ho media sira, iha Kampaun UN, iha Caicoli.

Hosi númeru ne’e mós, MS disponibiliza doze vasina ba labarik feto sira-ne’ebé la eskola ho idade entre tinan 11 no 14.

Vasina HPV ne’e importante atu evita infesaun ba labarik feto sira, tanba Virus Human Papillomavirus (HPV) mak virus transmitidu husi kontatu besik (kulit) no relasaun íntima.

Diretora Nasionál Promosaun Edukasaun no Promosaun Saúde, Emilia de Jesus Alves Mendonça, hateten vasinaHPV sei fó ba labraik feto idade 11 to’o 14, husi ne’e alvu mak estudante iha eskola sira.

“Vasina ne’e, tuir planu, ita sei lansa iha loron 22 jullu iha loron komemorasaun nasionál saúde atu prevene moras kankru serviks iha futuru,” Diretora Nasionál Promosaun Edukasaun no Promosaun Saúde ne’e hateten.

Doze vasina ba labarik feto sira-ne’e sei hahú de’it ho doze dahuluk, nune’e husu ba inan-aman sira atu disponibiliza oan sira atu partisipa iha vasina ne’e, tanba finaliadade husi moras serviks ne’e halakon ema-nia vida, bainhira la halo tratamentu sedu.

Governu nian haree katak, presiza halo ona prevensaun ida-ne’e ba tinan lima ka sanulu oin mai ba labarik feto timoroan seguru husi ameasa kankru serviks.

“Vasina ida-ne’e seguru tebe-tebes ba ita-nia oan ba futuru.  Favór inan-aman ne’ebé la asesu informasaun, bele hakbesik ba fasilidade saúde atu hetan informasaun husi profisionál saúde sira,” nia dehan.

Nia esplika, vasina ne’e seguru tanba liuhusi ona teste ba vasina hosi Organizasaun Mundial Saúde no Governu.

Midia iha papel importante evita rumor ba vasina HPV

Entretantu, Médiku iha Ministériu Saúde (MS), Estevão Mariz, sujere ba mídia hotu-hotu atu disemina informasaun los ba populasaun kona-ba importansia introdusaun ba vasina Human Papilomavirus (HPV) ba labarik feto ho idade 11 to’o 14 anus.

“Ajuda evita no kombate rumór relasiona ho imunizasaun no vasina HPV iha Timor-Leste. Ajuda kria ekosistema informasaun saudavel ba vasinasaun,” Estevão Mariz hateten iha enkontru ho jornalista sira kona-ba introdusaun HPV, iha Kampaun ONU, iha Caicoli.

Bainhira iha rumor kona-ba vasinasaun ba iha HPV, tenke konfirma ho Ministériu Saúde atu nune’e labele kria pániku ba komunidade.

Mediku ne’e dehan, informasaun hotu-hotu kona-ba vasina HPV tenke foti husi MS, Fundu Nasaun Unida ba Labarik (UNICEF) no Organizasaun Mundial Saúde (OMS).

Diretora Nasionál Promosaun Edukasaun no Promosaun Saúde, Emilia de Jesus Alves Mendonça, hateten, konsidera mídia iha papel imortante hodi ajuda Governu iha promosaun no kampaña vasina HPV ba populasaun.

Nia hateten, liuhosi mídia kanaliza informasaun ba inan-aman sira hodi mobiliza oan feto sira hodi bele partisipa iha vasina HPV atu asegura sira iha futuru.

“Di’ak liu prevene duke kura. Ami mak labele entaun konta mós papel importante husi mídia no sei konta mós autoridade lokal no relijiozu sira.

Koñese saida mak vasinasaun HPV

Vasinasaun HPV mak imunizasaun atu proteje isin-lolon husi infesaun Human Papillomavirus (HPV). Vasinasaun ida-ne’e fó benefísiu atu evita kankru iha área seksu (kelamin) no órgaun reprodusaun, hanesan kankru serviks no kankru pénis (mane nia moen).

 Human Papillomavirus (HPV) nu’udar virus kauza husi pele genital (área seksu) no kankru iha órgaun seksu, hanesan kankru serviks, vulva, Vagina, pénis no ánus (fatin soe bee boot). Virus ida-ne’e bele da’et liuhusi kontaktu direta ho kulit husi sofre-na’in sira ka vítima ba moras refere, espesialmente bainhira halo relasaun seksuál.

Aleinde pele genital no kankru seksu, virus HPV mós bele kauza ba tipu moras kankru iha parte garganta nia kotuk, nanál nia hun no amandél ka anjinas.

Vasinasaun HPV hanesan programa obrigatóriu Governu nian. Vasinasaun HPV fó ba labarik sfeto ira-ne’ebé atu tama ba idade adolescência, ba labarik mane no feto, Vasina ne’e mós bele fó ba adultu sira-ne’ebé seidauk ka nunka simu vasina HPV kompletu.

Grupu ne’ebé simu vasina HPV mak hanesan:

Labarik sira

Vasina HPV sei la’o di’ak bainhira fó vasina ne’e antes ema-ne’e hetan infesaun virus HPV, mak bainhira sei labarik no seidauk ativu halo relasaun seksuál.

Tanba ne’e, vasina ne’e ideal liu fó ba labarik ho idade 11-14. Ba labarik sira, vasina HPV presiza fó maisumenus dala-rua (2) ho durasaun tempu deskansa ne’e to’ o fulan neen (6) to’o fulan 12.

Adolesente no adultu

Vasina HPV bele fó ba ema adultu ne’ebé seidauk simu ka seidauk hetan vasinasaun HPV kompletamente bainhira sei labarik. Vasina HPV bele fó ba adolesente ho idade 15 to’o ema adultu ho idade 26.

Ema adultu ho idade 27-45 mós bele hetan vasina HPV, maibé ba dahuluk presiza tenke konsulta ba doutór sira. Vasina HPV bele fó ba ema adultu ne’ebé forma ona uma kain (kaben na’in) ka ativa seksualmente.

Maibé, presiza hanoin, Vasina ne’e la’ós feramenta atu troka kondom ne’ebé proteje isin-lolon husi infesaun seksuál, hanesan HIV no hepatitis B.

Ba ema adolesente no adultu, vasina HPV presiza fó ba ema ida to’o dala-tolu (3), Vasina daruak fó ba ema hafoin fulan ida (1) ka rua (2) husi vasina dahuluk, hafoin vasina datoluk ne’e fó hafoi fulan neen (6) husi vasinasaun daruak.

Jornalista : Jesuína Xavier

Editor       : Cancio Ximenes

iklan
iklan

Leave a Reply

iklan
error: Content is protected !!